ԱՄՆ-ն Մարիուպոլն օգտագործել է որպես խոլերայի հարուցիչի հետ աշխատանքի կենտրոն. ՌԴ ՊՆ

ԵՐԵՎԱՆ, 11 մայիսի - Sputnik. ԱՄՆ-ն Ուկրաինայում իր ռազմակենսաբանական ծրագրի շրջանակում օգտագործել է Մարիուպոլը որպես խոլերայի հարուցիչի հետ աշխատանքի տարածաշրջանային կենտրոն։ Տեղեկությունը հայտնել է ՌԴ ԶՈւ ռադիացիոն, քիմիական և կենսաբանական պաշտպանության զորքերի պետ Իգոր Կիրիլովը։

Գեներալն ավելացրել է, որ ընտրված մանրէահիմքերն ուղարկվել են Կիևի հանրային առողջության կենտրոն, որը կատարում էր նաև կենսաբանական նյութերն ԱՄՆ ուղարկելու գործառույթը:

«Նշված գործունեությունն իրականացվել է 2014 թվականից, ինչը հաստատվում է մանրէահիմքերի փոխանցման ակտերով», - ասել է Կիրիլովը:

ՊՆ ներկայացուցիչը նաև հայտնել է, որ նոր տեղեկություն է ստացվել Ուկրաինայի կենսալաբորատորիաներում ԱՄՆ-ի անմարդկային փորձերի մասին:

Մասնավորապես, փորձարկումներ են անցկացվել Ուկրաինայի քաղաքացիների նկատմամբ №1 հոգեբուժական հիվանդանոցում (Խարկովի մարզի Ստրելիչյե գյուղ): Գեներալը նշել է, որ փորձի ենթարկված հիմնական կատեգորիան ֆիզիկական հյուծման բարձր փուլում գտնվող արական սեռի 40-60 տարեկան հիվանդների խումբն է եղել։

Նա նշել է, որ ԱՄՆ-ին պատկանելը թաքցնելու համար կենսաբանական հետազոտություններ իրականացնող փորձագետները ժամանել են երրորդ երկրների տարածքով։

Կիրիլովը ցուցադրել է Ֆլորիդայի նահանգից Լինդա Հենթոյի լուսանկարը։ Նա անմիջականորեն մասնակցել է այդ աշխատանքներին:

Կիրիլովն ասել է, որ Ուկրաինայում կատաղության վիրուսի հետազոտություններին ամերիկյան Բեթել ինստիտուտի հետ համատեղ մասնակցել է նաև լեհական Անասնաբուժական ինստիտուտը։

Բացի այդ, Կիրիլովը նշել է` փաստացի ապացույցներ են ստացվել, որ Լեհաստանը ֆինանսավորել է Լվովի բժշկական համալսարանը, որի կազմում ընդգրկված է ԱՄՆ-ի ռազմա-կենսաբանական նախագծերի մասնակիցը՝ համաճարակաբանության և հիգիենայի ինստիտուտը:

Կիրիլովի խոսքով՝ Ուկրաինայում ՌԴ հատուկ գործողության ընթացքում հայտնաբերվել են 10 անօդաչու թռչող սարքեր, որոնք հագեցած են եղել 30 լիտր տարողությամբ նյութեր տարածող սարքավորումներով: Դրանք ապրիլի վերջին գտել են Կախովկա բնակավայրի շրջանում։

Ապրիլի վերջին Կախովկա բնակավայրի շրջանում ևս 10 նման ԱԹՍ է հայտնաբերվել։

Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։

Ուկրաինայում մարտական գործողությունները շարունակվում են արդեն 77-րդ օրը։