ԵՐԵՎԱՆ, 10 մայիսի – Sputnik. Ֆրանսիական ՊՍԺ-ի և Արգենտինայի հավաքականի 34-ամյա հարձակվող Լիոնել Մեսսին Սաուդյան Արաբիայի տուրիզմի պաշտոնական դեսպան է դարձել։ Տեղեկությունը հայտնում է Arab News-ը։
«Ոսկե գնդակի» 7-ակի դափնեկիրը զբոսաշրջության ոլորտի միջոցառումներին մասնակցելու համար Սաուդյան Արաբիա է մեկնել արդեն նոր կարգավիճակով։
Անցյալ տարվա հունվարին լրատվամիջոցները հայտնել էին, որ պորտուգալացի ֆուտբոլիստ Կրիշտիանու Ռոնալդուն, որին Սաուդյան Արաբիայի զբոսաշրջության դեսպանի պաշտոնի համար երկրի իշխանությունները տարեկան մոտ 6 միլիոն եվրո էին առաջարկում, հրաժարվել է այդ կարգավիճակից։
Հիշեցնենք, որ Արգենտինայի ազգային թիմի հարձակվող Լիոնել Մեսսին ստիպված էր հեռանալ իր գրեթե 20 տարվա ակումբից՝ «Բարսելոնայից», վերջինիս ֆինանսական խնդիրների պատճառով։ Ակումբն առաջարկել էր ֆուտբոլիստին նոր պայմանագիր կնքել, համաձայն որի` Մեսսիի աշխատավարձը կրկնակի կրճատվելու էր։
Լիոնել Մեսսին տեղափոխվեց ֆրանսիական ՊՍԺ։ 2021 թվականի վերջին Մեսսին յոթերորդ անգամ արժանացավ «Ոսկե գնդակի», ինչը բացարձակ ռեկորդ է։ Ոսկե գնդակների քանակով նրան զիջում է Կրիշտիանու Ռոնալդուն, որն ունի 6 «Ոսկե գնդակ»։