Իր պատմության մեջ առաջին անգամ. «Նորավանքը» Հայաստանի գավաթակիրն է. լուսանկարներ

ԵՐԵՎԱՆ, 8 մայիսի – Sputnik, Խաչիկ Չախոյան. «Հանրապետական» մարզադաշտում «Նորավանքը», 2։0 հաղթելով «Ուրարտուին», իր պատմության մեջ առաջին անգամ նվաճեց Հայաստանի գավաթը։

Ընդհանրապես գավաթային հանդիպումներն իրենց ընթացքով ու հոգեբանությամբ միշտ էլ տարբերվում են Պրեմիեր լիգայի հանդիպումներից։ Իսկ գավաթի եզրափակիչ խաղը իրոք լրիվ այլ հոգեբանություն է։ Հաշվի առնելով, որ մեկ խաղում հաղթանակով նախ տիտղոս, հետո էլ եվրոպական մրցասպարեզ են ապահովում թիմին, պարզ է, որ «Նորավանքն» ու «Ուրարտուն» զգուշություն կարող էին դրսևորել։ Ֆուտբոլիստների գործողություններն ավելի բարդացան առաջին կեսի առաջին 20 րոպեների ընթացքում, երբ խաղն ընթանում էր հորդառատ անձրևի ներքո։

Իհարկե զգուշություն կար, բայց թիմերն ավելի շատ անսպասելի տեմպ էին հաղորդում հանդիպմանը, քան զգուշանում։ Մինչև ընդմիջում երկու կողմերն էլ վտանգավոր կամ գոլային պահեր ստեղծեցին։ Լարվածությունը զգացվում էր ու գնալով բարձրանում էր։ «Ուրարտուի» դարպասի գրավումը նույնպես լրացուցիչ լարվածություն հաղորդեց կողմերի գործողություններին, ինչն էլ արտահայտվեց երկու կողմերի մարզիչների փոքրիկ վիճաբանությամբ։

Բայց ամեն ինչ արագ հարթվեց, ու խաղը շարունակվեց, սակայն արդեն ոչ հավասար պայմաններում։ «Նորավանքը» առջևում էր Թեմուր Մուստաֆինի արդյունավետ հարվածից հետո։

Երկրորդ խաղակեսում «Ուրարտուն» անհամեմատ ակտիվ էր, ու վտանգավոր գրոհներն ու հարվածները «Նորավանքի» դարպասի ուղղությամբ գնալով հաճախակի էին դառնում։ Ճնշումը մրցակցի դարպասին մեծացնելով` «Ուրարտուի» ֆուտբոլիստները զգալի տարածքային ու խաղային առավելություն ունեին։ Բայց գնդակը հայտնվեց գրոհող թիմի դարպասում։

Բաբու Չամ – Տենտոն Յենե երկքայլ կոմբինացիան ավարտվեց վերջինիս դիպուկ հարվածով, ու խաղի հիմնական ժամանակի ավարտից 14 րոպե առաջ, կրկնապատկելով իր առավելությունը, «Նորավանքը» իր համար պատմական արդյունք գրանցելու իրական հնարավորություն ստացավ։

«Ուրարտուի» բոլոր ջանքերը հաշիվը կրճատելու, հետո էլ պարտությունից խուսափելու համար ապարդյուն էին։ «Նորավանքը» նվաճեց Հայաստանի ֆուտբոլի գավաթը։