ԵՐԵՎԱՆ, 8 մայիսի – Sputnik. Մեծ Բրիտանիայի արքայազն Ուիլյամն ու նրա կինը՝ Քեյթ Միդլթոնը, Կարիբյան կղզիներում շրջագայությունից հետո մտածում են թագավորական տիտղոսներից հրաժարվելու մասին։ Այս մասին հայտնում է Mirror պարբերականը՝ վկայակոչելով թագավորական շրջապատին մոտ կանգնած իրազեկ աղբյուրին։
Հայտնում են, որ Բելիզ, Ճամայկա և Բահամներ այցելությունն այնքան էլ հաջող չի անցել, արքայական զույգին տեղ-տեղ դիմավորել են բողոքի ակցիաներով, ինչն էլ ծնել է համակարգի արդիականացման միտքը:
Քեմբրիջի դուքսն ու դքսուհին, իբրև թե, ուզում են, որ իրենց անունով դիմեն։ Բայց նրանք դրանով չեն սահմանափակվում, մտադիր են նաև չեղարկել ավանդական ողջույնի ձևերը՝ գլուխ խոնարհելն ու ռևերանսը։
Զույգը նաև դեմ է արտահայտվել պաշտոնական միջոցառումների ժամանակ իրենց և հանրության միջև մետաղական պատնեշների գոյությանը։ Նրանք ուզում են ավելի մոտ լինել մարդկանց, ավելի քիչ տաղտկալի ձևականություններ պահպանել և հրաժարվել մի շարք ավանդույթներից։