ԵՐԵՎԱՆ, 8 մայիսի – Sputnik․ Երգչուհի Սիրուշոն մեկնում է արտերկիր՝ երրորդ երեխային լույս աշխարհ բերելու: Տեղեկությունը ֆեյսբուքյան իր էջում հենց ինքն է հայտնել՝ հավելելով, որ հիմա անպայման կգրեն, թե եթե հայրենասեր ես, ինչու ես երեխաներիդ ուրիշ երկրներում ունենում։
Նա նշել է, որ սա երբեք էլ չի հասկացել, մի՞թե այլ երկրներում ծնված հայերը չեն կարող հայրենասեր լինել։
«Որպեսզի հիմա չպատմեմ բժշկական նրբությունների ու անձնական պատճառների մասին, ասեմ, որ այլ կերպ պարզապես հնարավոր չէ: Ու սա այն շրջանն է, որ հաստատ ավելի շատ կուզեի այստեղ լինել: Հոգով ու մտքով այստեղ եմ լինելու և հեռվից էլ փորձելու եմ մաքսիմալ օգտակար լինել»,- գրել է երգչուհին։
Նա նշել է, որ այս անգամն ամենադժվարն է լինելու, որովհետև ամուսինը՝ Լևոն Քոչարյանը, իր հետ չի լինելու։ Նա մնալու է և շարունակելու է պայքարը։
Սիրուշոն անկեղծանում է՝ ցավալի է գիտակցել, որ իրենց կյանքի ամենակարևոր պահերից մեկը «միասին չեն կիսելու, բայց այլ տարբերակ չկա»։
Երգչուհին նաև նշել է, որ հղիության հատկապես վերջին շրջանում նախընտրում է ավելորդ ուշադրությունից հեռու լինել, նույն պատճառով իր գործընկերներից շատերն են նախընտրում երկրից դուրս երեխային լույս աշխարհ բերել։ Սակայն իր դեպքում այդ որոշումը «օգտագործվում է քաղաքական անձանց ու նրանց հետևորդների կողմից ու ներկայացվում այլ կերպ»:
Վերջում Սիրուշոն շեշտել է, որ իր երկու երեխաներն էլ ՀՀ քաղաքացիներ են, իրենց ընտանիքը ապրել է, ապրում է ու շարունակելու է ապրել Հայաստանում։
Հիշեցնենք, որ Սիրուշոն ՀՀ երկրորդ նախագահ Ռոբերտ Քոչարյանի կրտսեր որդու՝ Լևոն Քոչարյանի կինն է։ Նրանք ունեն երկու որդի, շուտով լույս է աշխարհ է գալու զույգի դուստրը։
Հավելենք, որ Լևոն Քոչարյանն ակտիվորեն մասնակցում է «Դիմադրություն» շարժման գործողություններին, հանրահավաքներին, երթերին, փողոց փակելու ակցիաներին և այլն։ Վերջերս երկրորդ նախագահի որդին նույնիսկ բերման ենթարկվեց։