ԵՐԵՎԱՆ, 5 մայիսի – Sputnik. Ոստիկանությունը բերման ենթարկեց Երևանի Վաղարշյան փողոցը փակած, սակայն որոշ ժամանակ անց բացած մի քանի երիտասարդների։
Ոստիկանության ծառայողները մոտեցան տղաներին, որոնք այդ պահին պարզապես կանգնած էին մայթին, ասացին, որ կարգ են խախտել, և սկսեցին բիրտ ուժ կիրառելով տանել նրանց։
Երիտասարդները ոստիկանական մեքենայի միջից վանկարկում էին. «Առանց Նիկոլ, Հայաստան», «Նիկո՛լ, դավաճան»։
Որոշ ժամանակ անց ակցիայի այլ մասնակիցներ՝ ոստիկանության գործողություններից բարկացած, կրկին փակեցին փողոցը, սակայն այս անգամ՝ աղբամաններով։
Երբ ոստիկանությունը ցանկանում էր բերման ենթարկել ակցիայի մասնակիցներից մեկին, նա վազեց և մտավ մոտակա շենքերից մեկի շքամուտք, որի դռան վրա դոմոֆոն էր տեղադրված։ Ոստիկանները կարողացան բացել դուռը և ներս մտնել, բայց մուտքը երկկողմանի էր, և նրանք չկարողացան գտնել երիտասարդին։
Նշենք, որ առավոտից վերսկսկվել են անհնազանդության ակցիաները. քաղաքացիները փողոցներ են փակել Դավթաշենում, Արաբկիրում և Նոր Նորքում։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։ Ապրիլի 13-ին խորհրդարանում նա ափսոսանք հայտնեց, որ 2018-2019 թվականներին ժողովրդին չի ասել, որ «մեր բոլոր հեռու և մոտիկ բարեկամները մեզնից ակնկալում են, որ մենք այս կամ այն կոնֆիգուրացիայով Ադրբեջանին հանձնենք 7 հայտնի շրջանները և իջեցնենք Արցախի կարգավիճակի համար մեր սահմանած նշաձողը»։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 3-ին փակվեցին նաև միջմարզային մի քանի ճանապարհներ։
Մայիսի 4-ի և 5-ի առավոտյան անհնազանդության ակցիաները վերսկսվեցին։
Այս օրերին ոստիկանությունը պարբերաբար բերման է ենթարկում (երբեմն բիրտ ուժ կիրառելով) անհնազանդության ակցիաների առավել ակտիվ մասնակիցներին։