ԵՐԵՎԱՆ, 5 մայիսի – Sputnik. ՌԴ ավիացիան բարձր ճշգրտության հրթիռներով ոչնչացրել է Ուկրաինայի մեխանիզացված բրիգադներից մեկի կառավարման կետը: Այդ մասին ճեպազրույցի ժամանակ հայտնել է Ռուսաստանի պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը:
«Ռուսաստանի օդատիեզերական ուժերի օդային բազավորման բարձր ճշգրտության հրթիռներով խոցվել Է Ուկրաինայի զինված ուժերի 24-րդ առանձին մեքենայացված բրիգադի կառավարման կետը՝ Լոսկուտովկա բնակավայրի շրջանում, ազգայնականների զինամթերքի 2 պահեստ՝ Սևերսկի շրջանում, ինչպես նաև կենդանի ուժի և ռազմական տեխնիկայի կենտրոնացման 28 շրջան»,-ասել Է գեներալը:
Նրա խոսքով՝ ռուսական օդատիեզերական զորքերը մեկ օրում խոցել են 45 ուկրաինական ռազմական օբյեկտ։
Կոնաշենկովը հստակեցրել է, որ խոցված օբյեկտների թվում են 2 հրամանատարական կետ, կենդանի ուժի և ուկրաինական ռազմական տեխնիկայի կենտրոնացման 41 շրջան, ինչպես նաև հրթիռահրետանային սպառազինության պահեստ՝ Լուգանսկի Ժողովրդական Հանրապետության Վոյեվոդովկա շրջանում:
ՌԴ հրթիռային զորքերն իրենց հերթին ոչնչացրել են «Ուրագան» ՀԿՌՀ-ի մարտկոցը և ուկրաինական զորքերի հրետանային մարտկոցը՝ կրակային դիրքում, խոցվել է հակառակորդի կենդանի ուժի և տեխնիկայի կուտակումների 4 շրջան:
Ռազմական գերատեսչության տվյալներով՝ ռուսական ՀՕՊ համալիրները մեկ օրվա ընթացքում 3 ուկրաինական ԱԹՍ են խոցել, այդ թվում՝ մեկ «Բայրաքթար»։
«Ոչնչացվել է մինչև 190 մարդ անձնակազմ, սպառազինության և ռազմական տեխնիկայի 43 միավոր»,-ասել է Կոնաշենկովը։
ՌԴ պաշտպանության նախարարության տվյալներով՝ հատուկ ռազմական գործողության մեկնարկից ի վեր ոչնչացվել է 149 ինքնաթիռ, 112 ուղղաթիռ, 729 ԱԹՍ, 288 զենիթահրթիռային համալիր, 2846 տանկ և այլ մարտական զրահամեքենաներ, համազարկային կրակի ռեակտիվ համակարգերի 327 կայանք, դաշտային հրետանու 1323 հրանոթ և ականանետ, ինչպես նաև 2662 միավոր հատուկ ռազմական ավտոմոբիլային տեխնիկա:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 71-րդ օրը։