ԵՐԵՎԱՆ, 5 մայիսի – Sputnik. Հայաստանում և մարզերում բողոքի ակցիաներ անող ընդդիմադիրները խաղաղ երթի ժամանակ ոստիկանների գործողություններն անհամաչափ են համարում։
«Ես չեմ կարող ընկալել մեկին որպես ոստիկան, որին ասում ես` Համբիկ Սասունյանն է, նա, միևնույնն է, բերման է ենթարկում ու նման պարգև տալիս թուրքին։ Չեմ կարող պատկերացնել, որ կոտրված ձեռքով աղջկան հայ ոստիկանը տեսնի ու, միևնույն է, քաշի ու բերման ենթարկի, չեմ պատկերացնում նաև, որ հայ ոստիկանը իմ ասելուց հետո էլ բերման ենթարկի անչափահասին, որին ես գրկեցի, որ գոնե ձեռքերը չոլորի»,- Ֆրանսիայի հրապարակում բացօթյա ասուլիսում ասաց «Հայաստան» խմբակցության պատգամավոր Արամ Վարդևանյանը։
Նրա խոսքով` այսօր ողջ երթի ընթացքում, երբ նրանք քայլել են «Հրազդան» մարզադաշտի մոտով, իրենց կողքով անցել են 5-6 ոստիկանական ավտոբուսներ, որոնցում բազմաթիվ ծառայողներ են եղել։ Վարդևանյանի պնդմամբ` այդ գործողությունները եղել են հստակ գծված և պլանավորված։
Պատգամավոր Աննա Գրիգորյանը խոսեց իրենց երթի մասին, որն անցնում էր Աբովյան փողոցով, և որի ժամանակ կարմիրբերետավորները սկսել են անհամաչափ ուժ կիրառել։
«Իշխանություն չկա, իսկական իշխանությունը փողոցում է, իսկ Նիկոլը ոստիկանական ուժերի հետևում ուղղակի վախկոտի պես թաքնված է»,- ասաց Գրիգորյանը։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։ Ապրիլի 13-ին խորհրդարանում նա ափսոսանք հայտնեց, որ 2018-2019 թվականներին ժողովրդին չի ասել, որ «մեր բոլոր հեռու և մոտիկ բարեկամները մեզնից ակնկալում են, որ մենք այս կամ այն կոնֆիգուրացիայով Ադրբեջանին հանձնենք 7 հայտնի շրջանները և իջեցնենք Արցախի կարգավիճակի համար մեր սահմանած նշաձողը»։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 3-ին փակվեցին նաև միջմարզային մի քանի ճանապարհներ, մայիսի 4-ին անհնազանդության ակցիաները շարունակվեցին և եզրափակվեցին երեկոյան Ֆրանսիայի հրապարկում կազմակերպված հանրահավաքով։
Մայիսի 5-ի առավոտյան անհնազանդության ակցիաները վերսկսվեցին։