ԵՐԵՎԱՆ, 5 մայիսի – Sputnik. Կառավարության այսօրվա նիստում ՀՀ վարչապետ Նիկոլ Փաշինյանը դարձյալ անդրադարձավ Զանգեզուրի պղնձամոլիբդենային կոմբինատից կառավարությանը բաժնեմաս նվիրելու գործարքին ու դրա շուրջ տարատեսակ մեկնաբանություններին։
«Ժամանակ առ ժամանակ այդ թեման ծագում է, որ կառավարությունը չի բացահայտում, թե ինչպես է դարձել Զանգեզուրի պղնձամոլիբդենային կոմբինատի սեփականատեր։ Ոմանք նույնիսկ ասում են՝ «կասկածելի գործարք», «կոռուպցիոն գործարք»։ Սա շատ զարմանալի բան է։ Եթե որևէ իշխանավոր կամ իշխանավորի հորեղբոր տղա օֆշորներով այս սեփականությանը տեր դառնար, ոչ ոք չէր անհանգստանա, ինչպես եղել է միշտ, բայց որ պետությունը գույք է ձեռք բերել, չգիտես ինչու, կասկածելի է թվում։ Ի՞նչն է կասկածելի։ Ներդրողը, որը ձեռք է բերել նախկին բաժնետերերից բաժնեմաս, որոշել է ՀՀ-ին նվիրատվություն անել, և կառավարությունն էլ շնորհակալությամբ ընդունել է այդ նվիրատվությունը»,- ասաց Փաշինյանը։
Իսկ թե ինչու է ներդրողը որոշել նվիրատվություն անել, վարչապետը մեկնաբանեց նրանով, որ շուրջ 400 մլրդ դոլարի ներդրումային ծրագիրն առանց պետության մասնակցության հնարավոր չէ իրականացնել։
«Խոսքը պղնձաձուլարանի կառուցման մասին է, խոսքը, հույս ունենք` կհասնենք այդ օրվան, նոր ատոմակայանի կառուցման մասին է»,- հիշեցրեց Փաշինյանը։
Բացի այդ, վարչապետը շեշտեց, որ 2022թ-ի առաջին եռամսյակում պետությունը հարկային եկամուտների պլանը գերակատարել է 30 մլրդ դրամով, և ավելացրեց` բայց դա որևէ մեկին կասկածելի չի թվացել։
Հիշեցնենք` սեպտեմբերի 30-ին հայտնի դարձավ, որ Զանգեզուրի պղնձամոլիբդենային կոմբինատի բաժնետերերից մեկը` ռուսաստանյան «Արդյունաբերական ընկերություն» բաժնետիրական ընկերությունը, ՀՀ կառավարությանն է նվիրել իր բաժնեմասի 25%-ը։ Նույն օրը կառավարությունը գրավոր կարգով որոշեց ընդունել նվիրատվությունը։
Քանի որ «Արդյունաբերական ընկերություն» ԲԸ-ին պատկանում է կոմբինատի բաժնետոմսերի 60%-ը, այս գործարքի արդյունքում ՀՀ կառավարությունը դարձավ կոմբինատի 15%-ի բաժնեմասի սեփականատերը։
Հետաքրքրական է, որ «Արդյունաբերական ընկերություն» ԲԸ-ն նախկինում երբեք Զանգեզուրի պղնձամոլիբդենային կոմբինատի բաժնետերերի թվում չի հիշատակվել։
Բանն այն է, որ իրականում այն բաժնետեր է դարձել հենց սեպտեմբերի 30-ին ու նույն օրն էլ իր ձեռք բերած 60 տոկոս բաժնետոմսերի 25 տոկոսը նվիրել կառավարությանը։
Պարզվում է նաև, որ այս ընկերությունն իր հերթին պատկանում է կոմբինատի բաժնետեր «ԳեոՊրոՄայնինգ Արմենիա» ընկերությանը։
Հոկտեմբերի 6-ին ԱԺ-ում անդրադառնալով հիշյալ գործարքին` ՀՀ վարչապետ Նիկոլ Փաշինյանն ասել է, որ ռուսական այդ ընկերությունը կառավարության հետ գործարքի դիմաց ստանձնել է ՀՀ-ում պղնձաձուլարանի կառուցման պարտավորություն և բանակցություններ է վարում ՀՀ-ում նոր ատոմակայան կառուցելու մասին։