ԵՐԵՎԱՆ, 5 մայիսի – Sputnik. «Դիմադրություն» շարժման անդամները Ֆրանսիայի հրապարակից սկսեցին երթը։ Նրանք շարժվեցին Մաշտոցի պողոտա, ապա Կորյունի փողոց։
Երթն առաջնորդում են «Հայաստան» խմբակցության պատգամավորներ Գեղամ Մանուկյանն ու Աննա Գրիգորյանը։
«Ողջունում ենք հատկապես այն ոստիկաններին, որոնց մարզերից կտրել–բերել են այստեղ, որ իբր կարգուկանոն պահեն։ Բայց սա կարգուկանոն պահել չէ, սա Նիկոլի աթոռը մեկ օր ավել պահել է»,– հայտարարեց Մանուկյանը։
Երթի անդամները վանկարկում են. «Առանց թուրքի Հայաստան», «Առանց Նիկոլ Հայաստան», «Միություն, պայքար, հաղթանակ»։
Քաղաքացիները պատուհաններից ողջունում են երթի մասնակիցներին, իսկ մեքենայով անցնող վարորդներն ազդանշաններ են տալիս` այդկերպ աջակցելով շարժման մասնակիցներին։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։ Ապրիլի 13-ին խորհրդարանում նա ափսոսանք հայտնեց, որ 2018-2019 թվականներին ժողովրդին չի ասել, որ «մեր բոլոր հեռու և մոտիկ բարեկամները մեզնից ակնկալում են, որ մենք այս կամ այն կոնֆիգուրացիայով Ադրբեջանին հանձնենք 7 հայտնի շրջանները և իջեցնենք Արցախի կարգավիճակի համար մեր սահմանած նշաձողը»։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 3-ին փակվեցին նաև միջմարզային մի քանի ճանապարհներ։
Մայիսի 4-ի և 5-ի առավոտյան անհնազանդության ակցիաները վերսկսվեցին։
Այս օրերին ոստիկանությունը պարբերաբար բերման է ենթարկում (երբեմն բիրտ ուժ կիրառելով) անհնազանդության ակցիաների առավել ակտիվ մասնակիցներին։