ԵՐԵՎԱՆ, 3 մայիսի – Sputnik. Գերմանիայում Ուկրաինայի դեսպան Անդրեյ Մելնիկը երկրի կանցլեր Օլաֆ Շոլցին քննադատել է Կիև չայցելելու համար։ Մելնիկի խոսքը փոխանցում է Spiegel-ը։
Դիվանագետը Գերմանիայի կառավարության ղեկավարին անվանել է «նեղացած երշիկ» ու ասել, որ քաղաքական գործիչն իրեն երեխայի պես է պահում: Նա ընդգծել է, որ Ուկրաինայի նախագահ Վլադիմիր Զելենսկին, միևնույն է, ուրախ կլինի Շոլցին ընդունել Կիևում։
«Ուկրաինան սիմվոլիկ այցի փոխարեն սպասում է, որ Գերմանիայի կառավարությունն արագ կիրագործի ծանր սպառազինությունների մատակարարման վերաբերյալ Բունդեսթագի առաջարկը և կկատարի այդ խոստումները»,- ընդգծել է Մելնիկը:
Հիշեցնենք` ապրիլի 12-ին ԶԼՄ-ները գրեցին, որ Ուկրաինայի նախագահ Վլադիմիր Զելենսկին հրաժարվել է Կիևում ընդունել գերմանացի գործընկերոջը` Ֆրանկ Վալտեր Շտայնմայերին։
Դրանից հետո Շոլցն ասել է, որ նախագահին ընդունելու մերժումը Գերմանիայի կառավարության ղեկավարին Ուկրաինայի մայրաքաղաք այցելելու հնարավորություն չի տալիս: