ԵՐԵՎԱՆ, 3 մայիսի – Sputnik. Դիմադրություն շարժման առաջնորդներից Իշխան Սաղաթելյանը Ֆրանսիայի հրապարակում ընթացող հանրահավաքի ժամանակ ասաց, որ իշխանափոխությունից հետո չի լինելու «քոչարյանական, սերժական, դաշնակցական» իշխանություն։
«Ինչպիսի կառավարություն է ձևավորվելու․ ես մի քանի անգամ այս հրապարակից ասել եմ՝ ձևավորվելու է ազգային ժամանակավոր կառավարություն։ Դա չի լինելու որևէ կուսակցության, որևէ անհատի կառավարություն, դա չի լինելու դաշնակցական, հանրապետական, քոչարյանական կամ որևէ մեկի կառավարությունը, դա լինելու է հայ ժողովրդի կարող ուժերից բաղկացած ազգային կառավարություն», - ասաց Սաղաթելյանը։
Իշխան Սաղաթելյանի խոսքով՝ գործող իշխանությունը կա՛մ բանակցություններով է հանձնելու Արցախը, կա՛մ նոր պատերազմով։
«Եթե Նիկոլը մնա՝ պատերազմ կլինի, որովհետև ինքը խոստումներ ունի տված Ալիևին», - ասաց նա։
Դիմադրություն շարժման հանրահավաքը Ֆրանսիայի հրապարակում
© Sputnik / Asatur Yesayants
Սաղաթելյանը տեղեկացրեց, որ վաղը առավոտից ակցիաները շարունակվելու են, իսկ ժամը 12։00-14:00-ը մբողջ երկրում բողոքի և անհնազանդության համատարած ակցիաներ են լինելու։ Ժամը 15:30 քաղաքացիները հավաքվելու են Ֆրանսիայի հրապարակում, որպեսզի միասին հետևեն ԱԺ–կառավարություն հարց ու պատասխանին, որին ներկա է լինելու նաև Նիկոլ Փաշինյանը։ «Նիկոլը գալու է ԱԺ, մենք պետք է լինենք այս հրապարակում իր հրաժարականի հանրային պահանջը ներկայացնելու համար»,–ասաց Սաղաթելյանը։
Հիշեցնենք` Հայաստանում բողոքի նոր ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։ Ապրիլի 13-ին խորհրդարանում նա ափսոսանք հայտնեց, որ 2018-2019 թվականներին ժողովրդին չի ասել, որ «մեր բոլոր հեռու և մոտիկ բարեկամները մեզնից ակնկալում են, որ մենք այս կամ այն կոնֆիգուրացիայով Ադրբեջանին հանձնենք 7 հայտնի շրջանները և իջեցնենք Արցախի կարգավիճակի համար մեր սահմանած նշաձողը»։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 3-ի առավոտյան անհնազանդության ակցիաները վերսկսվեցին։