ԵՐԵՎԱՆ, 3 մայիսի – Sputnik. Արցախյան 44-օրյա պատերազմի մասնակիցներն անվասայլակներով փակել էին Երևանի Հերացի փողոցը` կաթվածահար անելով երթևեկությունը։
Նրանք պահանջում էին ՀՀ վարչապետ Նիկոլ Փաշինյանի հրաժարականը` նշելով, որ չեն ցանկանում` իրենց երեխաներն ապագայում թուրքի հետ ապրեն։ Պատերազմի մասնակիցները քաղաքացիներին կոչ էին անում միանալ իրենց։
«Ով ցանկանում է թուրքի հետ ապրել, թող գնա Բաքու ու Ալիևի հետ ապրի»,- ասաց նրանցից մեկը։
Քաղաքացիներից մեկը մոտեցավ անվասայլակներին նստած, պրոթեզավորված ոտքերով տղամարդկանց ու հորդորեց գնալ Արցախ և թուրքի ճանապարհը փակել։
«Ինչի՞ համար եք էս ամենն անում, ով միանալու էր, միացել է։ Ես չեմ միանում, ինչքա՞ն է տևելու սա, ինձ ժամանակ ասեք»,- ասաց նա։
Տղաները հորդորեցին իրենց ուղղություն չտալ, քանի որ միևնույն է` շարունակելու են ակցիան։
Մոտ 30-40 րոպե անց, ոստիկանների հորդորներից հետո նրանք բացեցին ճանապարհը։
Հիշեցնենք` Հայաստանում բողոքի նոր ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։ Ապրիլի 13-ին խորհրդարանում նա ափսոսանք հայտնեց, որ 2018-2019 թվականներին ժողովրդին չի ասել, որ «մեր բոլոր հեռու և մոտիկ բարեկամները մեզնից ակնկալում են, որ մենք այս կամ այն կոնֆիգուրացիայով Ադրբեջանին հանձնենք 7 հայտնի շրջանները և իջեցնենք Արցախի կարգավիճակի համար մեր սահմանած նշաձողը»։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 3-ի առավոտյան անհնազանդության ակցիաները վերսկսվեցին։