ԵՐԵՎԱՆ, 3 մայիսի – Sputnik. Met Gala-ի կարմիր գորգի վրա ամերիկահայ հեռուստաաստղ Քիմ Քարդաշյանի զգեստը դարձել է ամենաքննարկվողը։ Քսաներորդ դարի սեքս խորհրդանիշ Մերիլին Մոնրոյի զգեստը հագնելու համար 41-ամյա Քիմը երեք շաբաթում նիհարել է 7 կգ-ով։
Հեռուստաաստղը խոստովանել է, որ երբ առաջին անգամ փորձել է Մոնրոյի զգեստը, այն զգալիորեն փոքր է եղել իր համար։
«Ինձ համար դա իսկական մարտահրավեր էր: Ես մտադրվեցի ամեն գնով հագնել այն»,- նրա խոսքերը մեջբերում է New York Post-ը:
Քիմը ընդամենը մի քանի րոպե է աշխարհի ամենաթանկարժեք զգեստներից մեկը հագել։ Հագուստին այնքան զգույշ են վերաբերվել, որ հեռուստաաստղը փորձել է նկարվելիս հնարավորինս քիչ շարժումներ անել։ Կարմիր գորգից հետո Քիմը հագել է զգեստի կրկնօրինակը։
Նշենք, որ Մոնրոյի զգեստը առաջին «մերկ» հանդերձանքն էր, որը ստեղծվել էր մերկ մարմնի պատրանք ստեղծելու համար։ Դերասանուհու պատվերով լեգենդար հագուստը ստեղծել էր դիզայներ Ժան Լուիսը։ Մերիլին Մոնրոն իր կյանքի վերջին ելույթներից մեկն ունեցավ հենց այդ զգեստով և մահացավ Քենեդիի ծննդյան օրից երեք ամիս անց:
Նյու Յորքի Մետրոպոլիտեն թանգարանն ավանդույթի համաձայն կազմակերպում է ամենամյա Met Gala կոստյումի ամենամյա պարահանդեսը, որը համարվում է նորաձևության ոլորտում տարվա ամենահետաքրքիր, վառ և կարևոր իրադարձություններից մեկը: