ԵՐԵՎԱՆ, 3 մայիսի – Sputnik. ԱԺ նախագահ Ալեն Սիմոնյանն այսօր խորհրդարանի նիստի ընթացքում նկատողություն արեց նիստին ներկա իր քաղաքական թիմի անդամ պատգամավորներին ու փոխնախարարներին։
«Հարգելի՛ կառավարության գործընկերներ, հարգելի՛ պատգամավորներ, ասել «հարգելի՛ նախագահություն» և «հարգելի՛ նախագահող», այդքան էլ ճիշտ չէ։ «Հարգելի՛ ԱԺ նախագահ» և «հարգելի՛ փոխնախագահ», «հարգելի՛ պատգամավոր»։ «Նախագահող» և «նախագահություն» ասելը ճիշտ չէ։ Խնդրում եմ հետայսու ուշադիր լինել»։
Նշենք, որ այս նկատողությունը Սիմոնյանն արեց, երբ շրջակա միջավայրի փոխնախարար Գայանե Գաբրիելյանն ու ԿԳՄՍ փոխնախարար Կարեն Թռչունյանը, ինչպես նաև ԱԺ «Քաղաքացիական պայմանագիր» խմբակցության պատգամավոր Նարեկ Բաբայանն իրենց ելույթներում օգտագործեցին «հարգելի՛ նախագահություն» և «հարգելի՛ նախագահող» արտահայտությունները՝ դիմելով նիստը նախագահող ԱԺ նախագահ Ալեն Սիմոնյանին ու փոխնախագահ Հակոբ Արշակյանին։
Հիշեցնենք՝ խորհրդարանում այսօր մեկնարկել է հերթական նիստերի քառօրյան։ Նիստին ներկա են միայն իշխանական «Քաղաքացիական պայմանագիր» խմբակցության 64 պատգամավորներ։
Ընդդիմադիր խմբակցությունները, ինչպես և հայտարարել էին նախորդ քառօրյա նիստերի ընթացքում, շարունակում են բոյկոտն ու չեն ներկայացել խորհրդարան։