ԵՐԵՎԱՆ, 2 մայիսի – Sputnik. Ռուսաստանը գրեթե 200 հազար երեխա է տարհանել Ուկրաինայի, Դոնեցկի ու Լուգանսկի Ժողովրդական հանրապետությունների վտանգավոր շրջաններից։ Ընդհանուր առմամբ, սահմանը հատել է 1 092 137 մարդ։ Այս հայտարարությունն արել է ՌԴ պաշտպանության կառավարման ազգային կենտրոնի պետ, գեներալ-գնդապետ Միխայիլ Միզինցևը։
«Չնայած Կիևի ստեղծած բոլոր դժվարություններին և խոչընդոտներին` անցած օրվա ընթացքում, առանց ուկրաինական իշխանությունների մասնակցության, Դոնեցկի և Լուգանսկի Ժողովրդական Հանրապետությունների վտանգավոր շրջաններից, Ուկրաինայից Ռուսաստանի Դաշնության տարածք է տարհանվել 11 550 մարդ, այդ թվում՝ 1 847 երեխա, իսկ հատուկ ռազմական գործողության սկզբից ի վեր՝ 1 092 137 մարդ, որոնցից 196 356-ը երեխաներ են»,- ասել է նա:
Գեներալը հիշեցրել է, որ ՌԴ-ի սուբյեկտներում շարունակում են գործել տարհանվածների ժամանակավոր տեղավորման ավելի քան 9,5 հազար կետեր, որոնք լիովին կահավորված են անհրաժեշտ ամեն ինչով, նախատեսված են հանգստի վայրեր և տաք սնունդ: Փախստականներին օգնություն է ցուցաբերվում աշխատանքի տեղավորման հարցում, սոցիալական վճարումներ են տրամադրում, երեխաներին տեղ են ապահովում մանկապարտեզներում և ուսումնական հաստատություններում։
Նրա խոսքով՝ ուկրաինացի ծայրահեղականները բռնի ուժով են պահում խաղաղ բնակչությանը, քաղաքացիները Ռուսաստան տարհանվելու միջոցներ են փնտրում:
«Ուկրաինայի քաղաքներում ծայրահեղականների կողմից բռնի ուժով պահվող բնակչության զգալի մասը Ռուսաստան տեղափոխվելու հնարավորություն է փնտրում»,- ասել է Միզինցևը:
Գեներալը հայտնել է նաև, որ մի շարք քաղաքներում ուկրաինացի գրոհայինները իրենց դիրքերը կահավորել և տեխնիկան տեղակայել են դպրոցներում և հոգեբուժական հիվանդանոցում։
«Խարկովի մարզի Բարվենկովո քաղաքում թիվ 2 մարզային հոգեբուժական հիվանդանոցի շենքում ազգայնականները հենակետեր են կահավորել, իսկ նկուղում բռնի ուժով պահում են քաղաքացիական անձանց»,- նշել է նա։
Միզինցևի խոսքով` վերոհիշյալ փաստերը Կիևի իշխանությունների՝ սեփական ժողովրդի նկատմամբ շարունակվող անմարդկային վերաբերմունքի հերթական վառ վկայությունն են:
Նա նշել է, որ Ռուսաստանն արդեն ավելի քան 17 հազար տոննա մարդասիրական բեռ է հասցրել Ուկրաինա, 959 մարդասիրական ակցիա անցկացրել:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 68-րդ օրը։