Վրաստանի արտգործնախարարն այցելել է Ծիծեռնակաբերդ

ԵՐԵՎԱՆ, 30 ապրիլի – Sputnik. Վրաստանի արտգործնախարար Իլյա Դարչիաշվիլին այցելել է Հայոց ցեղասպանության զոհերի հուշահամալիր։ Տեղեկությունը հայտնում է ՀՀ արտգործնախարարությունը։

Դարչիաշվիլին հուշահամալիր է այցելել ՀՀ արտգործնախարար Արարատ Միրզոյանի ուղեկցությամբ։

Վրացի պաշտոնյան հարգանքի տուրք է մատուցել Ցեղասպանության զոհերի հիշատակին:

Նշենք, որ Դարչիաշվիլին Հայաստան է եկել պաշտոնական այցով։

ՀՀ ԱԳՆ-ում մեկնարկել է նրա և Արարատ Միրզոյանի հանդիպումը:

Պաշտոնական այցի շրջանակում նախատեսված են նաև հանդիպումներ ՀՀ նախագահ Վահագն Խաչատուրյանի, ՀՀ վարչապետ Նիկոլ Փաշինյանի և ՀՀ ԱԺ նախագահ Ալեն Սիմոնյանի հետ:

Հիշեցնենք` նախորդ տարվա սեպտեմբերին ՀՀ վարչապետ Նիկոլ Փաշինյանը Վրաստան մեկնեց պաշտոնական, իսկ դեկտեմբերին՝ աշխատանքային այցով: 2021թ. հոկտեմբերին Վրաստանի վարչապետ Իրակլի Ղարիբաշվիլին ժամանեց Հայաստան աշխատանքային այցով:

Երկու երկրների արտաքին գործերի նախարարությունների միջև տարբեր մակարդակներով հանդիպումներն ու շփումները կրում են պարբերական բնույթ:

2021թ. սեպտեմբերին ՀՀ վարչապետ Նիկոլ Փաշինյանի գլխավորած պատվիրակության կազմում Վրաստանում գտնվող ՀՀ արտգործնախարար Արարատ Միրզոյանը հանդիպում ունեցավ Վրաստանի փոխվարչապետ, ԱԳ նախարար Դավիդ Զալկալիանիի հետ: Իսկ 2022թ. մարտին Միրզոյանն աշխատանքային այցով մեկնեց Վրաստան: