ԵՐԵՎԱՆ, 29 ապրիլի - Sputnik. Երիտասարդ կատարողների «Նոր ալիք» միջազգային մրցույթն այս տարի չի անցկացվի։ Ինչպես հայտնում է Super պարբերականը, երաժշտական փառատոնի ղեկավարությունը որոշել է չեղարկել միջոցառումը՝ Ուկրաինայում ընթացող մարտական գործողությունների պատճառով։
Նշվում է, որ որոշումը վերաբերում է միայն չափահաս երգիչների մրցույթին, որը պետք է կայանար 2022 թվականի ամռանը Սոչիում։
Ինչ վերաբերում է «Մանկական Նոր ալիք»-ին, այն չեն չեղարկել, բայց հետաձգել են։ Նախատեսվում էր միջոցառումն անցկացնել մայիսին Ղրիմում, բայց կազմակերպիչները փառատոնը հետաձգել են մինչև աշուն։
«Նոր ալիքը» ամենամյա մրցույթ է, որն անցկացվում է 2001 թվականից։ 13 տարի շարունակ այն անցկացվում էր Յուրմալայում (Լատվիա), իսկ 2015 թվականից՝ Սոչիում։ Միջոցառման գաղափարի հեղինակներն են կոմպոզիտորներ Իգոր Կրուտոյն ու Ռայմոնդ Պաուլսը։
Փառատոնի պատմության ընթացքում սա երկրորդ չեղարկումն է։ 2020 թվականին մրցույթը չկայացավ կորոնավիրուսի համավարակի պատճառով։