ԵՐԵՎԱՆ, 28 ապրիլի – Sputnik. Երևանի տարբեր հատվածներում իրազեկման ակցիա անող Հայաստանի Հանրապետական կուսակցության անդամները երթով հասան Ազատության հրապարակ, որտեղ միացան այնտեղ նստացույց անող Արթուր Վանեցյանին։
Վերջինս հայտարարեց, որ միասին իրենք մեկ նպատակ ունեն՝ ունենալ հզոր հայրենիք, հզոր Արցախ, հզոր Հայաստան։
«Ամեն օր ավելի ենք շատանալու ու մեր մեծ հայրենիքում ապրելու ենք արժանապատիվ հայի պես։ Որևէ մեկը չի կարող խլել մեզնից մեր հայրենիքը։ Պետք է բոլորս մեկ բռունցք դառնանք ու ասենք, որ թշնամուն զիջելու հայրենիք չունենք»,- ասաց Վանեցյանը։
Նրանք սկսեցին վանկարկել` «Հայաստան, ոտքի՛», «Հայ ազգ, ոտքի՛», «Արցախ, ոտքի՛»։
ՀՀԿ-ական նախկին պատգամավոր Մարգարիտ Եսայանը լրագրողների հետ զրույցում ընդգծեց, որ բոլորը պետք է միասնական դուրս գան փողոց և հեռացնեն ՀՀ վարչապետ Նիկոլ Փաշինյանին կառավարությունից։
Հայտնել ենք, որ ՀՀԿ-ականների «Stop Նիկոլ» խորագրով երթը մեկնարկել էր Ավետիք Իսահակյանի արձանի մոտից, քայլելով Աբովյան փողոցով՝ նրանք հասել էին Կառավարության շենքի մոտ, որտեղ կարճ ժամանակով փակեցին Տիգրան Մեծի պողոտան, գունավոր ծխագլաններ վառեցին, այնուհետև շարունակեցին ճանապարհը Մելիք Ադամյան, Նալբանդյան, Թումանյան փողոցներով ու հասան Ազատության հրապարակ։
Արդեն մի քանի օր է` ընդդիմությունն ակցիաներ է անում Երևանում։ Երեկ մայրաքաղաքում առանձին ակցիաներ են իրականացրել «Հայաստան», «Պատիվ ունեմ» դաշինքները, «5165» շարժումը։
Ապրիլի 28-ի առավոտյան մի խումբ երիտասարդներ շարունակել են իրազեկման ակցիաները մայրաքաղաքի բուհերում։ Հանրապետության հրապարակում ակցիա էին ցանկացել անել «Ազատագրական շարժման» անդամները, սակայն նրանց մի մասին ոստիկանները գրեթե անմիջապես բերման էին ենթարկել` ձեռքներին Նիկոլ Փաշինյանի ծաղրանկարներ ունենալու համար։