ԵՐԵՎԱՆ, 28 ապրիլի – Sputnik. 44-օրյա պատերազմում զոհված, հետմահու հերոսի կոչման արժանացած ավագ սերժանտ Լևոն Ավետիսյանի հայրը՝ Միսակ Ավետիսյանը, այլ զոհված զինվորների ծնողների խնդրանքով դադարեցրել է հացադուլը։
Հայտնել էինք, որ 44-օրյա պատերազմում զոհված ավագ լեյտենանտ Լևոն Ավետիսյանի հայրը` Միսակ Ավետիսյանը, ապրիլի 25–ին հացադուլ է սկսել Ազատության հրապարակում։ Նա լրագրողներին հայտնել էր, որ իր այդ քայլի պատճառը վարչապետ Նիկոլ Փաշինյանի հայտարարությունն է։
Վարչապետը ապրիլի 13-ին խորհրդարանում հայտարարել էր, որ տարածքներ հանձնելով՝ հնարավոր է, որ կարողանար հազարավոր կյանքեր փրկել, սակայն հրաժարվելով դա անել՝ մեղավոր է դարձել հազարավոր մարդկանց զոհվելու համար։
«Ես դադարեցրել եմ հացադուլը, բայց ընկերներիս հետ միասին պայքարելու եմ այս դժբախտության դեմ։ Նա չի կարողանալու փախչել։ Շուշիի ազատագրման օրը՝ մայիսի 8-ին, նա այլևս վարչապետ չի լինելու»,- ասաց Ավետիսյանը։
Զոհված զինծառայողների ծնողները, որոնք վերջին օրերին բողոքի ակցիա էին կազմակերպել գլխավոր դատախազության մոտ, եկել էին Ազատության հրապարակ, որտեղ ընթացող բողոքի ակցիայի մասնակիցները շարունակում են պահանջել, որ վարչապետը պատասխան տա պատերազմի մասին իր սկանդալային հայտարարությունների համար։
«Մենք օր ու գիշեր այստեղ ենք լինելու։ Թող բոլորը, ովքեր պաշտպանում են մեր պահանջը, գան։ Ստիպելու ենք, որ գործը քննեն, մեղավորին պատժեն»,- ասաց մահացած Մխիթար Գալեյանի հայրը՝ Գարիկ Գալեյանը։
Հիշեցնենք, որ զոհված զինծառայողների հարազատները ապրիլի 26-ից բողոքի ակցիա են իրականացնում գլխավոր դատախազության շենքի առջև։ Նրանք գլխավոր դատախազ Արթուր Դավթյանին իրենց պահանջը ներկայացրին. ուզում են` զոհված տղաները համարվեն տուժող, իսկ նրանց հարազատները` տուժողների իրավահաջորդ։
Դատախազությունը հայտնել է, որ այդ միջնորդությունը բավարարվել է։ Ինչ վերաբերում է վարչապետ Նիկոլ Փաշինյանին մեղադրյալ ներգրավելու հարցով դիմումին, հսկող դատախազի կողմից այս միջնորդությունն ուղարկվել է վարույթն իրականացնող քննիչին՝ սահմանված կարգով քննարկելու նպատակով: