ԵՐԵՎԱՆ, 28 ապրիլի – Sputnik. Ադրբեջանը պղծել է Հադրութի եկեղեցին։ Տեղեկությունը հայտնում է karabakhrecords.info-ն։
Հաղորդվում է, որ ապրիլի 27-ին ադրբեջանական իշխանամերձ լրատվական գործակալությունները «Հադրութում նշել են Զատիկը» վերնագրով նյութեր են տարածել՝ հրապարակելով նաև Հադրութ քաղաքի Սուրբ Հարություն եկեղեցուց նոր լուսանկարներ։
«Լուսանկարների ուսումնասիրությունը հստակ ի ցույց է դնում, որ եկեղեցուց հանվել է խաչը։ Բացի այդ, ադրբեջանցիները՝ հետևելով Ադրբեջանի նախագահի՝ հայկական եկեղեցիների գրությունները ջնջելու հորդորին, ջնջել են եկեղեցու մուտքի արձանագրությունը առ այն, որ եկեղեցին վերանորոգվել է Միխայիլ Բաղդասարովի ֆինանսական աջակցությամբ»,- գրում է կայքը։
Շուշիում ադրբեջանցի վանդալները պղծել են Հովհաննես Թևոսյանի կիսանդրին։
Հավելենք, որ Սուրբ Հարություն եկեղեցին կառուցվել է 1621 թվականին, վերանորոգվել է 1819 թվականին, հենց այդ ժամանակ էլ տեղադրվել է եկեղեցու գմբեթը։
Սուրբ Հարություն եկեղեցին վերջին անգամ վերանորոգվել է 1999 թվականին՝ Բաղդասարովի ֆինանսական օժանդակությամբ։ Պատերազմից առաջ Սուրբ Հարությունը գործող եկեղեցի էր, ռազմական գործողությունների ընթացքում չէր տուժել։
Հիշեցնենք, որ Արցախյան 44-օրյա պատերազմից հետո Ադրբեջանի վերահսկողության տակ անցած տարածքներում շուրջ 4 000 հայկական մշակութային արժեքներ կան։ Հայկական կողմը բազմաթիվ ապացույցներ ունի, որ ադրբեջանցիները դրանք սկսել են պղծել ու ոչնչացնել։
Հայտնի է, որ պատերազմից հետո ադրբեջանցիները պղծել են Մատաղիսի հյուսիսարևմտյան հատվածում գտնվող, 1892-1898 թվականներին կառուցված Սուրբ Եղիշե Առաքյալ եկեղեցին, գետնին հավասարեցրել Մեխակավանի (Ջաբրայիլ) Զորավոր Սուրբ Աստվածածին եկեղեցին, ավերել Շուշի քաղաքի` ավելի քան 200 տարվա պատմություն ունեցող Կանաչ ժամը։