ԵՐԵՎԱՆ, 26 ապրիլի – Sputnik. Հատուկ գործողության ընթացքում ՌԴ ԶՈւ-ն և ԴԺՀ-ի ու ԼԺՀ-ի կազմավորումները զգալի տարածքներ են ազատագրել` ամբողջ Խերսոնի մարզը, Խարկովի, Զապորոժիեի և Նիկոլաևի մարզերի մի մասը։ Այս հայտարարությունն արել է ՌԴ պաշտպանության կառավարման ազգային կենտրոնի պետ, գեներալ-գնդապետ Միխայիլ Միզինցևը։
«Այդ տարածքներում վերականգնվում են բնակչության կենսապահովման, սոցիալական ենթակառուցվածքների և բնակարանային-կոմունալ տնտեսության օբյեկտները։ Սկսվել են գարնանացանի գործողությունները»,- ասել է նա։
Դրա հետ մեկտեղ, գեներալի խոսքով, Կիևի ռեժիմը խանգարում է ԴԺՀ-ի և ԼԺՀ-ի, ինչպես նաև Ուկրաինայի ազատագրված շրջանների բնակիչների վերադարձին:
«Ռուսական կողմից բացվող բոլոր հումանիտար միջանցքներն արգելափակվում են»,- նշել է Միզինցևը:
Գեներալի խոսքով՝ ԴԺՀ-ում Ուկրաինայի զինյալները դիրքեր են կահավորել ծերանոցում։
«Դոնեցկի Ժողովրդական Հանրապետության Լիմաան քաղաքում ուկրաինական ազգայնական կազմավորումների գրոհայինները հենակետեր են կահավորել և ծանր սպառազինություն տեղակայել ծերանոցում և անձնակազմին ու տարեց քաղաքացիներին բռնի ուժով պահում են որպես «կենդանի վահան»»,-նշել է նա:
Գեներալը հայտնել է, որ գլխավոր շտաբի «թեժ գիծն» արդեն 2 753 477 դիմում է ստացել Ուկրաինայի խաղաղ քաղաքացիներից, որոնք խնդրում են իրենց տարհանել ռուսական բանակի վերահսկողության տակ գտնվող տարածքներ կամ հենց ՌԴ։
Չնայած Կիևի ռեժիմի կողմից ստեղծվող խոչընդոտներին` անցած օրվա ընթացքում ավելի քան 10 հազար մարդ է Ուկրաինայից և Դոնբասից տարհանվել Ռուսաստան:
Գեներալի տվյալներով Ռուսաստանն Ուկրաինա է հասցրել արդեն ավելի քան 15,5 հազար տոննա հումանիտար բեռ։ Անցկացվել է ավելի քան 900 մարդասիրական ակցիա։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 62-րդ օրը։