ԵՐԵՎԱՆ, 26 ապրիլի – Sputnik. Իրազեկման ակցիա անող ընդդիմադիրները՝ ի նշան ոստիկանների դեմ բողոքի, որոշեցին 10 րոպե նստել Սայաթ-Նովա-Տերյան հատվածում։
Իրազեկման ակցիա անող ընդդիմադիրները որոշեցին 10 րոպե նստել Սայաթ-Նովա-Տերյան հատվածում
© Sputnik / Aram Nersesyan
«Հայաստան» խմբակցության պատգամավոր Իշխան Սաղաթելյանը հայտնեց, որ մի խումբ երիտասարդներ անօրինական են բերման ենթարկվել։
«Նրանք բերման են ենթարկվել փողոցներում նստելու համար, և մենք էլ, ի նշան ոստիկանության զգուշացման, 10 րոպե կնստենք գետնին։ Ուզում ենք բոլորին ցույց տալ, որ եթե պետք է, թող գան, բոլորին ձերբակալեն»,- ասաց նա։
Նշենք, որ իրազեկման ակցիա է անում նաև «Պատիվ ունեմ» խմբակցության ղեկավար Արթուր Վանեցյանը, և քիչ առաջ երկու ակցիաների մասնակիցները միացան իրար։
Հիշեցնենք` ՀՀ ԱԺ փոխխոսնակ, «Հայաստան» խմբակցության անդամ Իշխան Սաղաթելյանը ապրիլի 22-ին հայտարարեց Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Արդեն երկրորդ օրն է՝ ընդդիմությունն ակցիաներ է անում Երևանում։ Ապրիլի 26-ին հատկապես ակտիվ էին երիտասարդները։ Նրանց ակցիան այսօր մեկնարկեց Հայաստանի պետական տնտեսագիտական համալսարանի գլխավոր մասնաշենքի մոտ, որտեղ Արցախի դրոշ տեղադրեցին, այնուհետև Արցախի մեծ դրոշը պարզած՝ շարժվեցին դեպի Երևանի պետական համալսարան, հետո հասան ՀՀ կառավարության շենքի մոտ և որոշեցին նվեր հանձնել ՀՀ վարչապետ Նիկոլ Փաշինյանին, սակայն ոստիկանները սկսեցին ուժ գործադրել ու հեռացնել նրանց այդտեղից։ Ավելի ուշ հայտնի դարձավ, որ 10 հոգու տեղափոխել են ոստիկանություն։
ՀՅԴ երիտասարդական թևի ներկայացուցիչները փողոցներ փակեցին, իսկ 44-օրյա պատերազմում զոհված զինվորականների ծնողներն ու հարազատները երթի դուրս եկան։