ԵՐԵՎԱՆ, 26 ապրիլի – Sputnik. Առաջիկա օրերին ավելի մեծ քանակությամբ, ավելի դինամիկ բողոքի ակցիաներ կլինեն։ Իրազեկման երթի ժամանակ լրագրողների հետ զրույցում հայտնեց «Պատիվ ունեմ» խմբակցության ղեկավար Արթուր Վանեցյանը։
Այս պահին Երևանի կենտրոնում միաժամանակ երկու իրազեկման ակցիա է ընթանում` մի կողմից Վանեցյանն է իր համակիրների հետ, մյուս կողմից` «Դիմադրության շարժումը»։
«Ամեն օր ավելի շատ քաղաքացիներ են մեզ միանում, և արդյունքում մենք ունենալու ենք այն կրիտիկական զանգվածը, որի դիմաց որևէ իշխանություն չի կարող դիմակայել»,- ասաց Վանեցյանը։
Հարցին, թե ասում են` Նիկոլ Փաշինյանը կանգ չի առնելու ոչ մի բանի առջև, արդյոք նա ո՞ւժ էլ կկիրառի, Վանեցյանը պատասխանեց, որ վարչապետը չի կարող ուժ կիրառել։ Խմբակցության ղեկավարի խոսքով` եթե մարդկանց քանակն այնքան եղավ, որքան իրենք են ակնկալում, ապա ուժի կիրառումն անհնար է։
«Մենք կորցնելու բան այլևս չունենք։ Այն, ինչ կարևոր էր, արդեն իսկ կորցրել ենք։ Մեր հայրենիքի մի մասն ու մեր տղաներին ենք կորցրել»,- ասաց Վանեցյանը։
Հիշեցնենք` ապրիլի 17-ին Արթուր Վանեցյանը Ազատության հրապարակից ֆեյսբուքյան ուղիղ եթերով դիմեց քաղաքացիներին` կոչ անելով միանալ և միասին պայքարել հանուն Հայաստանի, Արցախի և հայ մնալու։ Նույն օրվանից նստացույց են անում նաև «Սև հովազ» ջոկատի անդամները։
Ապրիլի 18-ին Վանեցյանին միացան 44-օրյա պատերազմի մասնակից Նվեր Կիրակոսյանն ու Արթուր Ավագյանը։ Իսկ «5165» շարժման անդամները ապրիլի 19-ին Ազատության հրապարակից երթ անցկացրին` պահանջելով ՀՀ վարչապետ Նիկոլ Փաշինյանի հրաժարականը։ Նույն օրը երեկոյան Վանեցյանի գլխավորությամբ իրազեկման քայլերթ անցկացվեց։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։