ԵՐԵՎԱՆ, 25 ապրիլի – Sputnik. Երևանի «Վահագն Վիշապաքաղ» և «Տորք Անգեղ» հուշարձանները կմնան նույն վարչական շրջաններում, բայց կտեղափոխվեն այլ` ավելի տեսանելի վայրեր։ Այս մասին այսօր Երևանի քաղաքապետարանի ամենշաբաթյա գործակարգավարական խորհրդակցության ժամանակ հայտարարեց քաղաքապետ Հրաչյա Սարգսյանը։
«Ես համացանցրում նայեցի, որ տարբեր դիսկուրսներ կան, քննարկվում է տեղափոխելու հարցը։ Ասեմ, որ տրամադրվածությունն այնպիսին է, որ նույն վարչական շրջաններում մնան այդ արձանները։ Բայց ավելի տեսանելի վայրում լինեն, տենց քողարկված չլինեն»,- ասաց քաղաքապետը։
Քաղաքապետարանի Մշակույթի և տուրիզմի վարչության պետ Գոշ Սարգսյանն էլ հայտնեց, որ Նոր Նորքի 4-րդ զանգվածում, Գայի պողոտային հարող հատվածում գտնվող «Տորք Անգեղ» հուշարձանը ներառված է Երևան քաղաքի հուշարձանների ցանկում` որպես հանրապետական նշանակության հուշարձան, իսկ Մալաթիա-Սեբաստիայի Ծովակալ Իսակովի պողոտայի և Սեբաստիայի փողոցի խաչմերուկում գտնվող «Վահագն Վիշապաքաղը»` որպես տեղական նշանակության հուշարձան։ Ուստի, դրանց տեղափոխության համար անհրաժեշտ է հատուկ թույլտվություն։
Այդ նպատակով որոշվեց ստեղծել մասնագիտական աշխատանքային խումբ` հուշարձանների տեղափոխման բոլոր հարցերը քննարկելու համար։
Հրաչյա Սարգսյանը հանձնարարաեց այդ հարցով խորհրդակցել նաև ՀՀ ԿԳՄՍ նախարարության հետ։
Հիշեցնենք` հուշարձանների տեղափոխման մասին առաջին անգամ խոսվել էր մեկ շաբաթ առաջ` Երևանի ավագանու նիստի ժամանակ, երբ Հրաչյա Սարգսյանը հայտնեց, որ «Իմ քայլը» խմբակցության անդամ Արման Անտոնյանը ներկայացրել է նախագիծ «Վահագն վիշապաքաղ» և «Տորք Անգեղ» արձանների տեղափոխելու մասին։
Նախագծի հեղինակն իր այդ առաջարկը հիմնավորել էր դրանք ավելի տեսանելի վայրեր տեղափոխելու ու ավելի լայն շրջանակների համար ճանաչելի դարձնելու նպատակով։