ԵՐԵՎԱՆ, 25 ապրիլի – Sputnik. Մոսկվան Ռուսաստան-Հայաստան գագաթնաժողովի պայմանավորվածությունների շրջանակում պահպանել է Երևանի համար գազի արտոնյալ գնագոյացումը։
Այս մասին ՌԻԱ Նովոստիին տված հարցազրույցում հայտարարել է ՌԴ ԱԳՆ ԱՊՀ երկրների 4-րդ դեպարտամենտի տնօրեն Դենիս Գոնչարը:
«Այցի շրջանակում (ՀՀ վարչապետ Նիկոլ Փաշինյանի - խմբ.) ստորագրվել է փաստաթղթերի պատկառելի փաթեթ, այդ թվում՝ էներգետիկայի ոլորտում համագործակցության վերաբերյալ։ Պրոֆիլային ռուսական և հայկական գերատեսչություններն արդեն ձեռնամուխ են եղել ձեռք բերված պայմանավորվածությունների իրականացմանը։ Պայմանավորվել ենք մեր հայ ընկերների համար պահպանել գազի արտոնյալ գնագոյացումը։ «Գազպրոմ Արմենիան» ծածկում է «երկնագույն վառելիքի»՝ երկրի պահանջարկի 80 տոկոսը։ Հանրապետության տնտեսության մեջ «Գազպրոմի» գծով ներդրումների ծավալը գերազանցում է 800 միլիոն դոլարը»,- ասել է Գոնչարը։
Ավելի վաղ Հայաստանի փոխվարչապետ Մհեր Գրիգորյանը հայտարարել էր, որ ռուսական կողմի հետ պայմանավորվածություն է ձեռք բերվել, ըստ որի ռուսական գազի բազային գինը կմնա 1000 խորանարդ մետրի դիմաց 165 դոլար:
Սակայն այժմ հայկական կողմը պետք է լրացուցիչ վճարի գազի դիմաց, եթե նրա էներգետիկ արժեքը գերազանցում է 7 900 կկալ՝ 1 խորանարդ մետրի դիմաց, և չպետք է լրացուցիչ վճարի, եթե այն ավելի ցածր լինի (բայց փաստացի այն գրեթե գերազանցում է 8 հազար կկալ, իսկ առանձին ամիսներին հասնում է 8 500-ի)։ Համաձայնագիրը կնքվել է դեռևս 2013 թվականին, սակայն այդ հավելավճարների կիրառումը անընդհատ հետաձգվում էր։
Հավելենք, որ ապրիլի 1-ից ՀՀ շարքային սպառողների համար գազի գինը բարձրացել է 4․7 դրամով (1 խմ-ն)՝ 139 դրամի փոխարեն, դառնալով 143.7 դրամ։ Բացառություն են կազմում սոցիալապես անապահով սպառողները։