ԵՐԵՎԱՆ, 25 ապրիլի – Sputnik. Ժամանակակից արևմտյան ԶԼՄ-ները ֆեյքերի օգնությամբ սեպ են խրում Ռուսաստանի և նրա դաշնակիցների միջև և շարունակելու են անել դա, առաջին հերթին՝ հետխորհրդային տարածքում։ Դրանում համոզված է ՌԴ Հանրային պալատի տեղեկատվական հանրության, ԶԼՄ-ների և զանգվածային հաղորդակցությունների զարգացման հանձնաժողովի նախագահի առաջին տեղակալ Ալեքսանդր Մալկևիչը։
Sputnik Արմենիայի հարթակից Մոսկվա-Երևան-Մինսկ-Բիշքեկ-Նուր-Սուլթան տեսակամուրջի ընթացքում Մալկևիչը նշել է, որ Հայաստանի դեպքում բավական է մեկ գրագետ ֆեյք գցել դաշտ՝ հաշվի առնելով արտաքին եզրագծում առկա բարդությունները, «և այնպիսի հրդեհ կբռնկվի, որ էլ չասած»։
«Կեղծված նորություններ լցնելու են միտումնավոր, հատկապես բարձր զգայունություն ունեցող տարածքներում։ Այդ ուղղությամբ աշխատանք է ընթանում։ Աշխատանքն ընթանում է Մոլդովայում, համապատասխանաբար՝ Հայաստանում։ Բելառուսում առանձնապես խուլիգանություն չեն անի»,-ասել է Մալկևիչը։
Ներկայումս նա քաղաքացիական բնակչության համար 23 գլխավոր թվային սպառնալիք է առանձնացնում, որոնց թվում են ֆեյքերը, կիբեռբուլինգը, ֆիշինգը, լրտեսական ծրագրերն ու հավելվածները և այլն:
Մալկևիչը նշել է, որ արևմտյան ԶԼՄ-ները քաղաքական պատվեր են կատարում իրենց իշխանությունների կողմից՝ միտումնավոր խեղաթյուրելով նաև Ռուսաստանի գործողությունները, դրանց էությունն ու սկզբունքները միջազգային ասպարեզում: Ավելին, նրանք ֆեյքերի օգնությամբ փորձում են լարվածության դաշտ ստեղծել՝ սեպ խրելով ՌԴ-ի և հետխորհրդային տարածքում նրա դաշնակիցների միջև։
ՌԴ Հանրային պալատի հանձնաժողովի նախագահի առաջին տեղակալը համոզված է, որ Ռուսաստանին տեղեկատվական պատերազմ են հայտարարել սոցցանցերում, նրա տեսակետն արգելափակվում է և շարունակելու է արգելափակվել:
«Խնդիր է դրված լիովին բարոյալքել մեզ, խառնել երիտասարդների գիտակցությունը, Դալլեսի պլան 2․0 իրականացնել՝ երկրի մասնատում, հետխորհրդային տարածքի բոլոր պետությունների կողմից կամքի և սուբյեկտայնության կորուստ. բոլորը պարտավոր կլինեն հարմարվել և ինչ-որ էմիսարների հրամաններ կատարել»,-ասել է Մալկևիչը։
Նրա խոսքով՝ դրա համար ժամանակակից տեխնոլոգիաներ, գործիքներ կկիրառվեն, չի բացառվում պատմության ամբողջական վերաշարադրումը, օրինակ՝ Վիքիպեդիայում ։
Հակազդելու համար նա կոչ է անում սեփական հարթակ ստեղծել։
Պատասխանելով Sputnik Արմենիայի հարցին՝ Մալկևիչը պարզաբանեց, որ ներկայումս Հանրային պալատում պատրաստել են մեդիագրագիտության կրթական մոդուլի նախագիծ, Ռուսաստանի լուսավորության նախարարությունում կա այս տարվա աշնանից դպրոցներում ֆեյքերի դեմ պայքարի դասերի մեկնարկի նախագիծ:
Ավելին, Հյուսիսկովկասյան Դաշնային համալսարանում արդեն իսկ դաշնային սպառնալիքներին հակազդելու կենտրոն է ստեղծվել։
Մալկևիչը նշեց, որ անհրաժեշտ է ուսուցանել բոլորին՝ ՀԿ-ների առաջնորդներից մինչև պաշտոնյաներ։ Նա չափազանց անհրաժեշտ է համարում տեղեկատվական պաշտպանության համակարգման կենտրոնի ստեղծումը հետխորհրդային տարածքում, ԱՊՀ երկրներում: