Մևլութ Չավուշօղլուն` Թուրքիայի բարձրաստիճան պաշտոնյաներից մեկը, այդ երկրի արտաքին քաղաքականությունը կերտորղներից մեկը եթե «Գորշ գայլերի» նշան է ցույց տալիս հայերին, ովքեր բարձրաձայնում են Հայոց Ցեղասպանության ճանաչման հարցը, ուրեմն բոլորս պետք է հետևություն անենք դրանից։ Որովհետև սա է Թուրքիայի քաղաքականությունը։ Ուրուգվայում Թուրքիայի ԱԳՆ Մևլութ Չավուշօղլիի պահվածքի մասին խոսելիս` Sputnik Արմենիայի հետ զրույցում այս մասին թուրքագետ Տիրան Լոքմագյոզյանը։
«Գորշ գայլերի» նշանն ի ցույց է դրվում ոչ միայն այդ կազմակերպության անդամների կողմից, այլև ազգայնական, ֆաշիստական նշան է բոլոր թուրքերի համար։ Ըստ նրա` այստեղ ակնհայտորեն երևում է նաև Թուրքիայի պետական մոտեցումը։
Լոքմագյոզյանի խոսքով` նրանք, ովքեր ինչ–ինչ հույսեր են փայփայում հարևան երկրի հետ և խոսում բարեկամության, երկուստեք առևտրային կապերի մասին, թող վերջնականապես տեսնեն, որ սա է այն Թուրքիան, որի հետ ուզում են բարեկամանալ, և այդ երկիրն այդպիսին էլ մնալու է։
«Եթե կարծում ենք, որ կարելի է լավ հարաբերություններ ստեղծել Թուրքիայի հետ, դա միայն մեր ցանկությունն է, և ցանկալին տեսնում ենք որպես իրականություն, մինչդեռ Թուրքիան մեր հանդեպ բարեկամորեն տրամադրված չէ»,–ասաց թուրքագետը։
Լոքմագյոզյանի կարծիքով`այսօր ո՛չ թուրքական հասարակությունը, ո՛չ էլ Թուրքիայի կառավարությունը պատրաստ չեն ընդունել Հայոց ցեղասպանությունը և եթե առանձին մտավորականներ խոսում են դրա մասին, դա դեռ հավաքական կարծիք չէ։ Ըստ նրա` թուրքական հասարակության մտածելակերպը կերտվում է կառավարության կողմից, և պետության ծրագրերի մեջ ամենևին չի մտնում Հայոց ցեղասպանության ճանաչումը, հակառակը` Թուրքիան ամեն կերպ փորձում է խոչընդոտել ճանաչման գործընթացը։
Նշենք, որ Թուրքիայի արտաքին գործերի նախարար Մևլութ Չավուշօղլուն Ուրուգվայում ծաղրել է Հայոց ցեղասպանության տարելիցին նվիրված ակցիայի հայազգի մասնակիցներին, ովքեր իրենց բողոքն էին արտահայտում Թուրքիայի ժխտողական քաղաքականության ու թուրք նախարարի այցի դեմ։ Նա ավտոմեքենայի պատուհանից ցույց էր տվել թուրքական ազգայնական «Գորշ գայլեր» կազմակերպությունը խորհրդանշող ժեստը, իսկ նրանք, ովքեր հավաքվել էին փողոցում` արտգործնախարարին ողջունելու, ի պատասխան ծափահարել էին։
Արդեն հայտնի է, որ Մևլութ Չավուշօղլուի ժեստի համար Ուրուգվայում Թուրքիայի դեսպանին կանչել են ԱԳՆ։