ԵՐԵՎԱՆ, 24 ապրիլի – Sputnik. Ամերիկահայերն ԱՄՆ–ից կոնկրետ քայլեր են ակնկալում Հայոց ցեղասպանության հանցագործության արդարադատությունն ապահովելու և Հայաստանի և Արցախի դեմ Թուրքիայի ու Ադրբեջանի շարունակական սպառնալիքների ու հարձակումների արդյունքում երկրորդ ցեղասպանությունը կանխելու համար։ Արձագանքելով ԱՄՆ նախագահ Ջո Բայդենի ամենամյա ապրիլքսանչորսյան ուղերձին, հայտարարել է Ամերիկայի Հայ դատի հանձնախումբը (ANCA):
Տարածած հայտարարության մեջ Հայ դատի հանձնախումբը փաստում է, որ 2021 թվականին՝ Հայոց ցեղասպանության տարելիցից ընդամենը մեկ օր առաջ, նախագահ Բայդենը հրաժարվել էր Աջակցության ակտի 907-րդ կետից՝ «թույլ տալով շարունակել ԱՄՆ ռազմական օգնությունն Ադրբեջանին, ավտորիտար ռեժիմին, որը Թուրքիայի հետ միասին 44-օրյա ավերիչ պատերազմ սկսեց Հայաստանի ու Արցախի դեմ 2020 թվականին»։
ANCA-ն և ԱՄՆ կրոնական, էթնիկ և իրավապաշտպան կազմակերպություններից բաղկացած կոալիցիան նախագահ Բայդենին կոչ են արել դադարեցնել Ադրբեջանին զինելը:
Կազմակերպությունն առաջիկա շաբաթվա ընթացքում պատրաստվում է բաց նամակ հրապարակել` ԱՄՆ իշխանությանը կոչ է անելով զրոյացնել ռազմական օգնությունը Ադրբեջանին և ընդլայնել ԱՄՆ-ի օգնությունը Արցախին և Հայաստանին մինչև 150 միլիոն դոլար:
Կազմակերպության գործադիր տնօրեն Արամ Համբարյանի համոզմամբ` Բայդենի ուղերձը չի արտացոլում Ցեղասպանության ճանաչման իրական ոգին. ոչ մի ճնշում Թուրքիայի վրա, ոչ մի հակազդեցություն Արցախի դեմ Ադրբեջանի ցեղասպանական բռնության, ոչ մի ուժային մարտահրավեր Անկարայի կողմից այս հանցագործության շարունակական ժխտմանը։
«Նա կարող է և պարտավոր է ավելի լավ անել»,- ասել է Համբարյանը:
Ապրիլի 27-ին ամերիկահայերը կմիանան Կոնգրեսի առաջնորդներին Հայոց ցեղասպանության հիշատակի ամենամյա Կապիտոլիումի Հիլլի միջոցառմանը։