ԵՐԵՎԱՆ, 21 ապրիլի – Sputnik. Թուրքիայի ընդդիմադիր Ժողովրդահանրապետական (ԺՀԿ) կուսակցության առաջնորդ Քեմալ Քըլըչդարօղլուն հայտնել է, որ իր տան լույսն անջատվել է պարտքերի պատճառով։
Քեմալականների առաջնորդը նաև հայտնել է, որ այսօր երեկոյան իր տանը՝ մոմերի լույսի ներքո, մամուլի համար նոր հայտարարությոամբ հանդես կգա։
Այս տարվա փետրվարին ընդդիմադիրը հայտարարել էր, որ այսուհետև չի վճարելու էլեկտրաէներգիայի օգտագործման դիմաց հաշիվները՝ բարձր սակագների ողջ պատասխանատվությունը դնելով Թուրքիայի նախագահ Ռեջեփ Թայիփ Էրդողանի վրա:
Թուրքիայում բնական գազի և էլեկտրաէներգիայի սակագները բարձրացել են 2022 թվականի հունվարի 1-ի գիշերը։ Արդյունաբերական օգտագործման համար գազի գներն աճել են 25% - ով, կենցաղային նպատակներով օգտագործվող գազի գները՝ 50% - ով։ Իսկ էլեկտրաէներգիայի դեպքում սակագինը բարձրացել է 52- 130% - ով՝ կախված սպառողի կարգավիճակից։ Ավելի վաղ Էներգետիկայի և բնական պաշարների նախարար Ֆաթիհ Դոնմեզը հայտարարել էր, որ երկրի իշխանություններն աշխատում են էլեկտրաէներգիայի գների իջեցման հնարավորության վրա: Երկրի մի շարք շրջաններում բողոքի ակցիաներ են տեղի ունեցել։