Մենք այստեղ ենք, որ կարողանանք տեղ հասնել. տեր Շահեն այցելեց հացադուլ հայտարարած տղաներին

ԵՐԵՎԱՆ, 21 ապրիլի – Sputnik. Ազատության հրապարակում հացադուլ հայտարարած 44-օրյա պատերազմի մասնակիցներ Նվեր Կիրակոսյանին և Արթուր Ավագյանին այցելել է տեր Շահե քահանա Հայրապետյանը:

Տեր Շահեն ասաց՝ տղաներին ոչ թե հորդորել է դադարեցնել հացադուլը, այլ ասել՝ ուզում է, որ առողջ մնան։ Նա նշեց, որ եղել են դեպքեր, երբ հանցագործները հրաժարվել են ընդունել մեղքը և հացադուլ են արել: Սակայն այս տղաները մաքուր, քրիստոնյա անձնավորություններ են:

Հարցին, թե արդյո՞ք ինքը պահանջում է Նիկոլ Փաշինյանի հրաժարականը, տեր Շահեն ասաց՝ իրենք հիմա Արցախի համար են մտահոգված.«Մենք կորցնում ենք հայոց հողերը: Պետք է ուժեղանանք և առաջ գնանք՝ հերիք է ողբանք կորցրածի համար։ Թշնամին դարեր շարունակ ապացուցել է, որ հայատյաց է: Մենք այստեղ ենք, միասին ենք, որ կարողանանք տեղ հասնել ինչ մեթոդով՝ Աստված կթելադրի»:

Իսկ մեկ այլ հարցին, թե Եկեղեցին ի՞նչ քայլեր է մտածում հայրենիքի փրկության ճակատի ձևավորման վերաբերյալ, նա պատասխանեց, թե երբ հայրենիքը առանց պետական ղեկավարի էր, եկեղեցին պահում էր հայրենիքը: Իսկ հիմա մեկ հարց կա՝ արդյո՞ք պետական ղեկավարությունը պահում է մեր հայրենիքը:

Հավելենք, որ հացադուլ հայտարարած տղաներն էլ ասացին, որ այսօր երեկոյան հայտարարությամբ են հանդես գալու:

Հիշեցնենք` ապրիլի 17-ին ՀՀ ԱԺ «Պատիվ ունեմ» խմբակցության ղեկավար Արթուր Վանեցյանը Ազատության հրապարակից ֆեյսբուքյան ուղիղ եթերով դիմեց քաղաքացիներին` կոչ անելով միանալ և միասին պայքարել հանուն Հայաստանի, Արցախի և հայ մնալու։ Նույն օրվանից նստացույց են անում նաև «Սև հովազ» ջոկատի անդամները։

Ապրիլի 18-ից Վանեցյանին են միացել 44-օրյա պատերազմի մասնակից Նվեր Կիրակոսյանն ու Արթուր Ավագյանը։ Վերջիններս անժամկետ հացադուլ են սկսել։

Իսկ «5165» շարժման անդամները ապրիլի 19-ին Ազատության հրապարակից երթ են անցկացրել` պահանջելով ՀՀ վարչապետ Նիկոլ Փաշինյանի հրաժարականը։ Նույն օրը երեկոյան իրազեկման քայլերթ է անցկացվել Արթուր Վանեցյանի գլխավորությամբ։