Ցեղասպանությունների ու մասնավորապես Հայոց ցեղասպանության թեման լավ ու ճիշտ՝ թիրախային ձևով պետք է ուսուցանվի դպրոցում։ Աշակերտները պետք է ցավ ապրեն, բայց դրա կողքին պետք է նաև հասկանան, որ իրենց վճռականությունից է կախված լինելու այն, որ հետագայում չկրկնվեն ցեղասպանությունները։ Sputnik Արմենիայի եթերում նման տեսակետ հայտնեց կրթական հարցերի փորձագետ Մենուա Սողոմոնյանը՝ նշելով, որ ցեղասպանության դասավանդումը պետք է ուշադիր կազմակերպել, որ աշակերտների մոտ միայն ահասարսուռ պատկերներ չլինեն, ինչի հետևանքով կարող է դեպրեսիա առաջանալ։
Ապրիլի 20-ին Հայոց ցեղասպանության թանգարան-ինստիտուտում բացվել է «Հայոց ցեղասպանության դասավանդման մարտահրավերները 21-րդ դարում» խորագրով եռօրյա գիտաժողովը, որը ֆինանսավորվել է նաև ՀՀ ԿԳՄՍՆ–ի կողմից։ Գիտաժողովի ընթացքում քննարկվել է, օրինակ, ավագ դպրոցներում ցեղասպանության դասավանդման հնարավոր ռազմավարությունը։
«Իրականում նաև կոգնիտիվ դիսոնանս է առաջանում այս մասին խոսելիս, քանի որ մի կողմից իշխանությունները հետ են կանգնում միջազգայնորեն ճանաչելու և դատապարտելու ուղեգծից, մյուս կողմից քննարկում են դպրոցներում ցեղասպանություն առարկան»,– ասաց Սողոմոնյանը։
Ըստ նրա` պետք է այս առաջարկը դեռ մասնագիտական հանրույթում ուսումնասիրվի, պետք է ներկայացվեն ցեղասպանությունը որպես առարկա դասավանդելու մտահղացման հիմքերը, հետազոտություններ պետք է արվեն։
Եթե առարկան այնուամենայնիվ դասավանդվի, Սողոմոնյանի կարծիքով, կարևոր է, որ այն աշակերտների մոտ ամուր պետություն ունենալու գաղափարն ամրապնդելու նպատակ ունենա։
«Այդ ամենն իմանալով հանդերձ աշակերտների մեջ պետք է ամրապնդվի մեր պետությունը ամուր պահելու հանգամանքը, որովհետև միայն պետությունն ամուր պահելով է հնարավոր դիմակայել հենց այդ ցեղասպանության սպառնալիքներին, իսկ մենք այսօր ակնհայտ տեսնում ենք այդպիսի սպառնալիքներ»,- ընդգծեց փորձագետը։
Նշենք, որ Հայոց ցեղասպանության թանգարան-ինստիտուտում բացված գիտաժողովին արտերկրից ժամանած գիտնականներ են մասնակցել, որոնց հետ քննարկումների միջոցով հայ մասնագետները փորձել են պատկերացում կազմել, թե ինչպես է դասավանդվում ցեղասպանությունների թեման օտար երկրներում` հայկական և ոչ հայկական միջավայրում` նկատի ունենալով այն փաստը, որ օտարերկրյա մասնագետները ներկայացնում են հիմնականում այն ազգերը, որոնք ևս տարբեր ժամանակներում ենթարկվել են ցեղասպանության։