ԵՐԵՎԱՆ, 21 ապրիլի – Sputnik. 44-օրյա պատերազմում զոհված հերոսների հարազատները փորձում են Ազատության հրապարակում վրան տեղադրել և միանալ 44-օրյա պատերազմի մասնակիցներ Նվեր Կիրակոսյանին և Արթուր Ավագյանին։
«Մենք որոշել ենք միանալ մեր տղաներին»,- նշեց ծնողներից մեկը։
Ոստիկանները փորձում էին խոչընդոտել վրանի տեղադրմանը։ Նրանք ժամանակ խնդրեցին ծնողներից՝ ճշտումներ անելու։
«Սա պայքար է հանուն հայրենիքի, այստեղ ուղղորդված ոչինչ չկա»,- նշեց «Պատիվ ունեմ» խմբակցության ղեկավար, ապրիլի 17-ից Ազատության հրապարակում բողոքի ակցիա իրականացնող Արթուր Վանեցյանը։
«Բացեք, ես եմ թույլ տալիս, Արցախի հերոսի մայրն է թույլ տալիս»,- ասաց Արցախի հերոս Դավիթ Առուշանյանի մայրը՝ Լիդա Առուշանյանը։
Նրա խոսքերից հետո մարդիկ միացան ու րոպեների ընթացքում կանգնեցրին ծածկը։
Ոստիկանները որոշեցին գոնե առժամանակ չմիջամտել։
«Մեծ հաշվով, մեզ սա պետք չէ։ Մեր երեխաները կանգնած էին սնարյադների, անձրևի, ձյան տակ, մենք առանց սրա չե՞նք կարող կանգնել։ Այստեղ հարգանքի հարց է»,- նշեց զոհված զինծառայողներից մեկի հայրը։
Նստացույցին միացած ծնողները կոչ են անում մյուս ծնողներին միանալ իրենց։ Ծնողներից մեկն էլ նշեց՝ երեկ մենք ավելի քիչ էինք, այսօր ավելի շատ ենք, վաղն ավելի շատ կլինենք։
«Վե՛ր կացեք, ծնողնե՛ր, վե՛ր կացեք, գիտեմ, մեր ցավը մեծ է, 24 ժամ ցավ եմ զգում, վե՛ր կացեք, խնդրում եմ ձեզ, մի՛ նստեք, մարզերից եկեք, էս սրիկաները մոտավորապես թվեր են ասում, ինչքան զոհեր, վիրավորներ ունենք։ Խնդրում եմ, զոհերի ծնողներ, վիրավորների ծնողներ, վե՛ր կացեք պայքարի, եկե՛ք մեր տղերքի մոտ՝ կանգնում ենք 44-օրյայի մեր տղերքի կողքը։ Մենք էստեղ ենք հավաքվում, ոչ մի քաղաքական ուժի հետ գործ չունենք»,- նշեց զոհված զինծառայողներից մեկի հայրը։
Հիշեցնենք, որ Ազատության հրապարակում ակցիա իրականացնող ԱԺ «Պատիվ ունեմ» խմբակցության ղեկավար Արթուր Վանեցյանը հայտարարել էր՝ առաջիկա օրերին ականատես կլինենք ավելի լայնածավալ բողոքի ակցիաների՝ ավելի կոնկրետ գործողություններով: