ԵՐԵՎԱՆ, 20 ապրիլի – Sputnik. Հայաստանի և Ադրբեջանի միջև հարաբերությունների կարգավորման աջակցության հարցերով Ռուսաստանի ԱԳ նախարարի հատուկ ներկայացուցիչ Իգոր Խովաևի գլխավոր խնդիրներից է խաղաղության պայմանագրի նախապատրաստման հարցում աջակցել հայ և ադրբեջանցի գործընկերներին: Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Զախարովայի խոսքով, նա արդեն ակտիվորեն ներգրավվել է աշխատանքի մեջ, օգտակար խորհրդակցություններ է անցկացրել Երևանում, և արդեն համաձայնեցված է նրա այցը Բաքու: Ամսաթվի մասին ավելի ուշ տեղեկություն կհաղորդվի։
«Երկխոսության հիմքը Հայաստանի հետ միջպետական հարաբերությունների հաստատման համար Ադրբեջանի կողմից առաջարկված հիմնարար սկզբունքներն են, և ընդհանուր առմամբ՝ Երևանի կառուցողական արձագանքն այդ առաջարկություններին»,– ասել է նա:
Այս ամենի հետ մեկտեղ Զախարովան նշել է, որ Ռուսաստանի միջնորդական ջանքերը հիմնվում են «Ռուսաստանի, Հայաստանի և Ադրբեջանի ղեկավարների հայտարարությունների մշակման անփոխարինելի փորձի վրա», որոնք թույլ են տվել կանգնեցնել արյունահեղությունը տարածաշրջանում և բացել հումանիտար խնդիրների համալիր լուծման իրական հեռանկարները` տրանսպորտային հաղորդակցությունների վերականգնում, հայ–ադրբեջանական սահմանի սահմանազատում:
Ավելի վաղ հայտնի էր դարձել, որ ԵԱՀԿ Մինսկի խմբի ռուս համանախագահ Իգոր Խովաևը կշարունակի իր աշխատանքը որպես Հայաստանի և Ադրբեջանի միջև հարաբերությունների կարգավորման աջակցության հարցերով Ռուսաստանի ԱԳ նախարարի հատուկ ներկայացուցիչ:
Հետաքրքիր է, որ նման որոշում կայացվել է մյուս համանախագահող երկրների` ԱՄՆ-ի և Ֆրանսիայի մերժման պայմաններում, որոնք հրաժարվել են հակամարտության կարգավորման շուրջ աշխատել ՌԴ–ի հետ։ Նման մերժման մասին ավելի վաղ հայտնել էր Ռուսաստանի ԱԳ նախարար Սերգեյ Լավրովը։