ԵՐԵՎԱՆ, 19 ապրիլի — Sputnik. Նոր Զելանդիան նոր պատժամիջոցներ է սահմանել Ռուսաստանի 18 խոշորագույն բանկերի և ֆինանսական կազմակերպությունների դեմ՝ Ուկրաինայում ծավալվող հատուկ գործողության պատճառով։ Այդ մասին ասված է Նոր Զելանդիայի արտաքին գործերի նախարար Նանայի Մախուտայի հայտարարության մեջ:
«Այդ խոշոր կազմակերպությունները կազմում են Ռուսաստանի բանկային ակտիվների մոտ 80 տոկոսը», - ասել է Մախուտան:
Մասնավորապես, պատժամիջոցները վերաբերում են «Ալֆա-բանկին», «Ռուսաստանի բանկին», ՌԴ կենտրոնական բանկին, «Գազպրոմբանկին», «Սբերբանկին» և «Վնեշէկոնոմբանկին»:
Ավելի վաղ Նոր Զելանդիան պատժամիջոցներ էր սահմանել ՌԴ նախագահ Վլադիմիր Պուտինի, ԱԱԾ անդամների, ռուս քաղաքական գործիչների, գործարարների, ռազմական գործիչների դեմ։ Ապրիլի 25-ից Նոր Զելանդիան նաև ռուսական ներմուծման համար 35 %-ի չափով լրացուցիչ տուրք կսահմանի:
Արևմտյան երկրները պատժամիջոցներ են սահմանել ՌԴ-ի դեմ՝ Ուկրաինայում սկսված հատուկ գործողության պատճառով։ Մի շարք ընկերություններ հայտարարել են ռուսական շուկայից հեռանալու և երկրում արտադրությունները փակելու մասին։ Ռուսաստանի ԱԳ նախարար Սերգեյ Լավրովը նշել էր, որ ընկերությունները, որոնք հրաժարվում են աշխատել Ռուսաստանի հետ, դա անում են ճնշման տակ, սակայն Ռուսաստանը կլուծի տնտեսության հետ կապված բոլոր խնդիրները, որոնք նրա համար ստեղծում է Արևմուտքը:
ՌԴ նախագահ Վլադիմիր Պուտինը հայտարարել է, որ Ռուսաստանին զսպելու և թուլացնելու քաղաքականությունը Արևմուտքի վաղեմի ռազմավարությունն է, իսկ պատժամիջոցները լուրջ հարված են հասցնում ողջ համաշխարհային տնտեսությանը: