ԵՐԵՎԱՆ, 18 ապրիլի – Sputnik. Եվրասիական միությունում ուզում են զրոյացնել ևս 1 500 ապրանքների մաքսատուրքերը։ Sputnik Արմենիա միջազգային մուլտիմեդիոն կենտրոնում կայացած տեսակամուրջի ժամանակ հայտնեց Եվրասիական տնտեսական հանձնաժողովի առևտրի հարցերով նախարար Անդրեյ Սլեպնևը։
Մոտ մեկուկես հազար ապրանք մինչև 2022 թվականի սեպտեմբերի վերջն արդեն իսկ ազատված է մաքսատուրքերից, իսկ օրերս կոլեգիան կընդունի նման որոշումների հերթական փաթեթը: Ինչպես և նախորդ անգամ, մաքսատուրքերը զրոյացվում են Եվրասիական ագրոարդյունաբերական համալիրի, դեղագործության, մեքենաշինության անհրաժեշտ ապրանքների, նյութերի և համալրիչների համար:
Դրանց թվում են հացահատիկային և այլ մշակաբույսերի սերմերը, ագրոքիմիկատները, դեղորայքը և դեղագործական նյութերը, որոնք գործածվում են դրանց արտադրության համար, ինչպես նաև շարժիչներն ու մեքենաշինության այլ բաղադրիչները (ինքնաթիռաշինության համար այն կգործի մինչև 2023 թվականի վերջը):
Սլեպնևն ավելացրել է, որ մաքսատուրքերի զրոյացումը, որը ժամանակավոր բնույթ է կրում, կօգնի բիզնեսին մոտ 200 մլրդ ռուբլի խնայել: Այդ միջոցները կօգնեն մասնակիորեն փոխհատուցել լոգիստիկայի համար աճող ծախսերը (ամբողջ աշխարհում կոնտեյներային և այլ փոխադրումների կտրուկ թանկացման պատճառով):