ԵՐԵՎԱՆ, 16 ապրիլի – Sputnik. ՌԴ ԱԳՆ պաշտոնական ներկայացուցիչ Մարիա Զախարովան RT-ի հետ զրույցում ասել է, որ տարիներ շարունակ Գերմանիան ԱՄՆ-ի հետ ինտենսիվ ռազմակենսաբանական գործունեություն է իրականացրել Ուկրաինայում։
«Հաստատված տեղեկության համաձայն` գերմանական կողմը կենսաբանական անվտանգության ոլորտում իր գործունեությունը համակարգել է ամերիկյան դաշնակիցների հետ, որոնք Ուկրաինայում առնվազն 30 կենսաբանական լաբորատորիաներից բաղկացած ցանց են ստեղծել, որոնցում նաև վտանգավոր գիտահետազոտական ուսումնասիրություններ են իրականացվել։ Գերմանիայի պաշտոնատար անձանց կոչ ենք անում անհապաղ դադարեցնել կեղծ լուրեր տարածելը, թե իբր մեր երկիրը պատրաստվում է միջազգային իրավունքով արգելված զենք կիրառել ռազմական հատուկ գործողության շրջանակում»,- ընդգծել է նա։
Զախարովան վստահեցրել է, որ նման հայտարարությունները կարող են Ուկրաինայի նեոնացիստական գումարտակներին սարսափելի սադրանքների դրդել, որոնց ողբերգական հետևանքների բարոյական պատասխանատվությունն ընկնելու է նաև Բեռլինի վրա։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Հատուկ գործողության նպատակը Ուկրաինայի ապառազմականացումն է ու ապաազգայնականացումը, ինչպես նաև նրան չեզոքության մղելը։
Ուկրաինայում մարտական գործողություններն ընթանում են արդեն 52-րդ օրը։