Դպրոցներում հարևան երկրների լեզուներն ուսուցանելու գաղափարն ինքնին վատը չէ, սակայն հարցն այն է, որ մենք այսօր դպրոցներում չենք կարողանում հիմնական երկու օտար լեզուները հավուր պատշաճի սովորեցնել աշակերտներին, որոնք ուսումնական ծրագրով պարտադիր են, ուստի նոր լեզուներ ավելացնելու դեպքում պետք է հաշվի առնել նաև երեխաների ցանկությունը` արդյոք ուզո՞ւմ են սովորել, օրինակ, վրացերեն կամ ադրբեջաներեն, Sputnik Արմենիայի հետ զրույցում ասաց կրթական հարցերի փորձագետ Սերոբ Խաչատրյանը։
Նրա դիտարկմամբ, քանի որ ԿԳՄՍ նախարարությունը փորձում է մերձեցնել դպրոցական և արտադպրոցականն կրթությունը, ավելի լավ կլինի, որ նման ծրագրերն իրականացվեն դասաժամերից դուրս և արտադպրոցական հաստատություններում։
«Նման հաստատություններ կան գրեթե բոլոր համայնքներում, որտեղ կարելի է բացել լեզվի խմբակներ։ Օրինակ, եթե Նոր Նորք համայնքում կան երեխաներ, որոնք ցանկանում են վրացերեն, ադրբեջաներեն, պարսկերեն կամ թուրքերեն սովորել, կարող են հաճախել համապատասխան խմբակներ»,- ասաց կրթական հարցերի փորձագետը։
Խաչատրյանի կարծիքով` մեկ դպրոցի վրա կենտրոնանալը նույնպես կարող է դիտվել որպես օպտիմալ տարբերակ, որտեղ հնարավոր կլինի սովորել հարևան երկրներից մեկի լեզուն, բայց մյուս կողմից էլ կարող է այդ դպրոց հաճախող ոչ բոլոր երեխաները ցանկանան սովորել նոր օտար լեզու` հատկապես ադրբեջաներեն կամ թուրքերեն, կարող է լինել և այնպես, որ կողքի դպրոցում գտնվեն ադրբեջաներեն կամ թուրքերեն սովորել ցանկացող երեխաներ, ուստի դասավանդումը կարելի է կազմակերպվել կենտրոնացված տեղերում, իսկ բոլոր դպրոցներում դասավանդելու պարագայում կառաջանա նաև ռեսուրսների, այսինքն` մասնագետների քանակի ապահովման խնդիր։
Փորձագետն ուշադրություն հրավիրեց այն հանգամանքի վրա, որ հանրակրթական դպրոցներում օտար լեզուների ծրագրերն առանց այդ էլ ծանրաբեռնված են, ուսուցանումը լավ վիճակում չէ, և նոր լեզուների դասավանդումը կլինի հավելյալ բեռ։ Ըստ նրա` հարևան երկրների լեզուներ սովորելու հարցում կարող են շահագրգռված լինել այն աշակերտները, որոնք հետագայում նպատակ ունեն մասնագիտանալու դրանցում, ուստի նրանց համար կարելի է դասընթացներ կազմակերպել արտադպրոցական հաստատություններում, դասերից հետո՝ օրվա առանձին ժամերին։
Նշենք` ԿԳՄՍ նախարար Վահրամ Դումանյանը հայտարարել է, որ Հայաստանի դպրոցներում հարևան երկրների լեզուների ուսուցման հարցը մնում է նախարարության օրակարգում։
Նրա խոսքով, դա զուտ կրթական և բարիդրացիական շփումների նպատակ է հետապնդում, որովհետև կա սկզբունք, ըստ որի` պետք է ծանոթ լինել հարևան երկրների և՛ լեզվին, և՛ մշակույթին։