Ռուս-ուկրաինական հակամարտության անդրադարձը Հայաստանի տնտեսության վրա բազմակի է, որովհետև ՀՀ-ի և ՌԴ-ի միջև սերտ կապեր կան, և Ռուսաստանի շուկան մեր արտահանվող ապրանքների համար հիմնականն է։ Խոսելով ՌԴ-ի դեմ Արևմուտքի սահմանած չընդհատվող պատժամիջոցների և ՀՀ-ի տնտեսության վրա դրանց ազդեցության մասին` Sputnik Արմենիայի հետ զրույցում ասաց տնտեսագետ Արմեն Քթոյանը։
Հակամարտության հետևանքով առանձին ապրանքների խմբաքանակների մատակարարման մասով արդեն իսկ կան որոշակի կրճատումներ, նախատեսվում են նաև տրանսֆերտների կրճատումներ, և եթե 2014 թվականի իրադարձությունների նման անկում գրանցվի, ապա իրավիճակն ավելի կվատթարանա։
«Մեզ մոտ ակտիվորեն ներկայացված է նաև ռուսական կապիտալը, շատ ոլորտներում ներգրավված են ռուսական ընկերություններ, անկախությունից ի վեր Հայաստանում ներդրումների ծավալով ՌԴ-ն առաջատար է, և հիմա նախատեսվում են կապիտալ ներդրումների կրճատումներ ևս։ Կախված այն հանգամանքից, թե պատժամիջոցներն ինչ ազդեցություն կունենան կոնկրետ ընկերությունների գործունեության վրա, դա շղթայական ռեակցիայով կազդի մեզ մոտ ներկայացված սուբյեկտների աշխատանքի վրա, ինչպես օրինակ, Թեղուտի պարագայում»,- ասաց տնտեսագետը։
Բացի այսդ, ՌԴ-ից եկող տրանսֆերտներն ունեն շատ կարևոր դերակատարություն, քանզի ձևավորվում են եկամտի տեսքով այն ոլորտներում, որոնք պատժամիջոցների պայմաններում բավական խոցելի են, հետևաբար, կապիտալ նախագծերը կարող են սառեցվել, օրինակ, շինարարության ոլորտում,և դա ամենահավանական ուղղություններից մեկն է։
Տնտեսագետի կարծիքով` ճիշտ է, ռուբլին որոշակիորեն վերականգնվեց, բայց եթե պատժամիջոցները երկար շարունակվեն, ապա ֆինանսական կայունության պահպանման հետ կապված խնդիրներ կառաջանան և, չի բացառվում, որ ռուբլու նոր արժեզրկումն է՛լ ավելի կդժվարացնի արտահանման գործընթացը։
Նշենք, որ ՌԴ ԱԳՆ ԱՊՀ երկրների առաջին վարչության տնօրեն Միխայիլ Եվդոկիմովը հայտարարել է, որ ՌԴ-ի և Բելառուսի նկատմամբ կիրառված Արևմուտքի պատժամիջոցներն իրենց մասշտաբներով աննախադեպ են ու ազդել են Եվրասիական տնտեսական միության անդամ բոլոր երկրների վրա։
Նա նաև տեղեկացրել է, որ ԵԱՏՄ հնգյակն աշխատում է հետևանքների հաղթահարման ուղղությամբ։