ԵՐԵՎԱՆ, 14 ապրիլի – Sputnik. «Մոսկվա» հածանավի վրա կրակի օջախը մեկուսացվել է, հայտնում է ՌԴ ՊՆ–ն։
««Մոսկվա» հածանավի վրա կրակի օջախը մեկուսացված է, բաց օջախներ չկան։ Զինամթերքի պայթյունները կասեցվել են»,- ասվում է հաղորդագրության մեջ։
Գերատեսչությունից հայտնել են նաև, որ հածանավը պահպանում է լողունակությունը, հիմնական հրթիռային սպառազինությունը վնասված չէ։
«Հածանավի անձնակազմը տարհանվել է Սևծովյան նավատորմի` մերձակայքում գտնվող այլ նավեր»,- ասվում է հաղորդագրության մեջ։
Ներկա պահին քայլեր են ձեռնարկվում հածանավը նավահանգիստ տեղափոխելու համար։ Հրդեհի բռնկման պատճառները պարզվում են։
Ավելի վաղ ՌԴ ՊՆ-ն հայտնել էր, որ «Մոսկվա» հրթիռակիր հածանավի վրա հրդեհ է բռնկվել, գրանցվել են ռազմամթերքի պայթյուններ։