ԵՐԵՎԱՆ, 13 ապրիլի – Sputnik. Ֆրանսիայի նախագահ Էմանուել Մակրոնը հրաժարվել է Ուկրաինայում Ռուսաստանի գործողությունները կոչել «ցեղասպանություն», նա հորդորել է զգույշ լինել տերմինների օգտագործման հարցում, գրում է ՌԻԱ Նովոստին։
«Ես զգույշ կլինեի տերմինների առումով, քանի որ ռուսներն ու ուկրաինացիները եղբայրական ժողովուրդներ են։ Բայց այն, ինչը տեղի է ունենում խելագարություն է, ես միաժամանակ նայում եմ փաստերին»,- ասել է Մակրոնը՝ պատասխանելով այն Frans 2–ի լրագրողի հարցին, թե կօգտագործի՞ արդյոք «ցեղասպանություն» եզրույթը։
Ֆրանսիայի նախագահը հավելել է, որ ինքն ամեն ինչ անում է այս պատերազմը կանգնեցնելու և խաղաղությունը վերադարձնելու համար։ Սակայն վստահ է, որ բանավոր էսկալացիան չի օգնի դրան։
ԱՄՆ նախագահ Ջո Բայդենի նախօրեին առաջին անգամ Ուկրաինայում Ռուսաստանի Դաշնության գործողությունները ցեղասպանություն անվանեց։ Ավելի ուշ նա բացատրեց իր դիրքորոշումը` պարզաբանելով, որ «հետզհետե ավելի պարզ է դառնում, որ Պուտինը պարզապես փորձում է ոչնչացնել ուկրաինացիների գոյության գաղափարը»։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Ուկրաինայում մարտական գործողություններն ընթանում են արդեն 49–րդ օրը։