ԵՐԵՎԱՆ, 12 ապրիլի – Sputnik. Երևան քաղաքի ընդհանուր իրավասության դատարանը (Շենգավիթի նստավայր) հետաձգեցՀՀ երկրորդ նախագահ Ռոբերտ Քոչարյանի և նախկին փոխվարչապետ Արմեն Գևորգյանի դեմ հարուցված քրգործով նիստը։
Քոչարյանի պաշտպան Հովհաննես Խուդոյանը դատարանին ներկայացրեց բժշկական տեղեկանքը, համաձայն որի` նախագահի բուժումը պետք է շարունակվի ևս 3-5 օր։
Դատավոր Աննա Դանիբեկյանը տեղեկացրեց նաև, որ դատարանը ստացել է «Հայաստան» խմբակցության պատգամավոր Արմեն Գևորգյանի` երկրից ժամանակավորապես բացակայելու վերաբերյալ միջնորդությունը, որը կքննարկվի հաջորդ նիստին։
Հաշվի առնելով նախագահ Քոչարյանի բացակայությունը՝ դատական նիստը հետաձգվեց մինչև ապրիլի 19-ը։
ՀՀ երկրորդ նախագահը շաբաթներ առաջ Ծաղկաձորում դահուկ քշելիս վնասվածք էր ստացել։ Քոչարյանի գրասենյակի համակարգող Բագրատ Միկոյանը Sputnik Արմենիային ասել էր, որ նա տնային պայմաններում ինտենսիվ բուժում է ստանում։
Հիշեցնենք` ՀՀ երկրորդ նախագահ Ռոբերտ Քոչարյանն ու նախկին փոխվարչապետ Արմեն Գևորգյանը քրեական գործով անցնում են որպես մեղադրյալներ։ Քոչարյանը մեղադրվում է առանձնակի խոշոր չափերով կաշառք ստանալու, իսկ Գևորգյանը` փողերի լվացման մեջ։