ՔՊ–ն լուծեց պաշտպանության հանձնաժողովի փոխնախագահի հարցը

ԵՐԵՎԱՆ, 12 ապրիլի – Sputnik. Ազգային ժողովի հերթական նիստում այսօր, ըստ էության, լուծվեց ԱԺ պաշտպանության ու անվտանգության հարցերի մշտական հանձնաժողովի փոխնախագահի ընտրության չարչրկված հարցը։

Դրանով սահմանվում է, որ մշտական հանձնաժողովի նախագահի թեկնածուի չընտրվելու դեպքում թեկնածու առաջադրելու իրավունք ունեցող խմբակցությունը 5 աշխատանքային օրվա ընթացքում պետք է նոր թեկնածու առաջադրի։ Հակառակ դեպքում այդ պաշտոնում թեկնածու առաջադրելու իրավունքն անցնում է մեծամասնություն ներկայացնող քաղաքական ուժին։

ԱԺ ընդդիմադիր երկու խմբակցությունները նախապես հայտարարել էին, որ բոյկոտում են ԱԺ քառօրյա նիստերը և մեկնում են Արցախ, Տավուշ, Սյունիք ու Գեղարքունիք` զբաղվելու երկրի առջև ծառացած լուրջ խնդիրների լուծմամբ։

Հետևաբար ԱԺ կանոնակարգով ընդդիմությանը հատկացված պաշտոնին վերաբերող որոշումն ընդունվեց առանց նրանց։

Հիշեցնենք` ԱԺ պաշտպանության և անվտանգության հարցերի հանձնաժողովի փոխնախագահի պաշտոնում «Հայաստան» խմբակցությունը 14 անգամ առաջադրել է Արթուր Ղազինյանի թեկնածությունը, իսկ ԱԺ մեծամասնությունը 14 անգամ մերժել է նրան։ Ընդդիմադիրները հայտարարել են, որ այլևս թեկնածու չեն առաջադրելու, այդ օրվանից նրանք չեն մասնակցում հանձնաժողովի նիստերին։

Հանձնաժողովի` դեկտեմբերի 14-ի նիստում նախագահ Անդրանիկ Քոչարյանը հայտարարել էր, որ ՔՊ–ն թեկնածու չի առաջադրում, քանի որ չի շտապում ընդդիմությանը հասանելիք թափուր պաշտոնը վերցնել, ու այդ նպատակով ընդդիմությանը 1 շաբաթ ժամանակ էր տվել։ Մեկ շաբաթ անց` դեկտեմբերի 21-ին, Քոչարյանն ասել էր, որ «Քաղաքացիական պայմանագիրը» դարձյալ թեկնածու չի առաջադրել, բայց իրենք բարի կամք են դրսևորում` ընդդիմությանը նորից հնարավորություն տալով կոնսենսուսի գալ իշխող ուժի հետ ու նոր թեկնածու առաջադրել։ «Եթե այդպիսի բան չլինի, համոզված եմ` հաջորդ արտահերթ նիստին ՔՊ–ն մեր խմբակցությունից տեղակալի թեկնածություն կներկայացնի»,– ասել էր նա։

Ընդդիմությունն էլ իր հերթին հայտարարել է, որ ԱԺ հանձնաժողովի նախագահի հայտարարությունը հակասում է ԱԺ Կանոնակարգ օրենքին, որով հանձնաժողովի նախագահի թեկնածուին պետք է առաջադրի ընդդիմությունը։