ՀՀ արտակարգ իրավիճակների նախկին նախարար Անդրանիկ Փիլոյանի կալանավորումը ՀՀ վարչապետ Նիկոլ Փաշինյանի համար և՛ մարդկայնորեն, և՛ բարոյական, և՛ քաղաքական առումով շատ ցավալի իրադարձություն է: Նա այսօր այս մասին ասաց ԱԻ նորանշանակ նախարար Արմեն Փամբուխչյանին ԱԻՆ աշխատակազմին ներկայացնելու ժամանակ, հայտնում է վարչապետի մամուլի ծառայությունը։
Հայտնել էինք, որ ԱԻ փոխնախարար Արմեն Փամբուխչյանը նշանակվել է ԱԻ նախարար` փոխարինելով վերջերս կալանավորված Անդրանիկ Փիլոյանին։
«Սովորաբար նման դեպքերում մենք նոր նախարարին նշանակում ենք, հին նախարարին ճանապարհում, շնորհակալություն հայտնում կատարված աշխատանքի համար: Գիտեք, որ այս պարագայում մենք մի փոքր այլ, անսովոր կամ նույնիսկ աննախադեպ իրավիճակ ունենք: Եվ ես պիտի ուղիղ ու անկեղծ ձեզ ասեմ, որ չափազանց ցավում եմ իրադարձությունների նման զարգացման համար»,–ասել է Փաշինյանը։
Նրա խոսքով` պետք է հստակ արձանագրել, որ ՀՀ–ում ի վերջո օրենքի գերակայությունը միայն վերնագիր պիտի չլինի, օրենքի առաջ բոլորի հավասարությունը միայն վերնագիր պիտի չլինի։
Վարչապետը նշել է, որ, այնուամենայնիվ, Փիլոյանի դեպքում չպետք է մոռանալ անմեղության կանխավարկածի մասին։
Փամբուխչյանն էլ նշել է, որ ամբողջ ծավալով տիրապետում է ոլորտի աշխատանքներին և առաջնահերթություններին:
Հիշեցնենք, որ ԱԻ նախկին նախարար Անդրանիկ Փիլոյանը մարտի 31-ին 2 ամսով կալանավորվեց. նա մեղադրվում է կաշառք վերցնելու մեջ։
Ապրիլի 1-ին Փիլոյանն ազատվեց պաշտոնից։ Դրանից հետո մամուլում լուրեր էին շրջանառվում, որ հենց Փամբուխչյանն էլ փոխարինելու է Փիլոյանին։