ԵՐԵՎԱՆ, 10 ապրիլի - Sputnik. Եվրահանձնաժողովի ղեկավար Ուրսուլա ֆոն դեր Լյայենը հայտարարել է, որ սովորաբար երկրի անդամակցության գործընթացը ԵՄ-ին երկար տարիներ է տևում, սակայն Ուկրաինայի դեպքում միության անդամները պետք է պատրաստ լինեն այդ գործընթացն արագացնելու համար: Տեղեկությունը հայտնում է ՌԻԱ Նովոստին։
«Ուկրաինայի համար ամենակարևորն այն է, որ ինքը որոշի, թե ինչ է ուզում անել ապագայում, ինչպես է ցանկանում կառուցել իր երկիրը։ Նա ցանկանում է անդամակցել Եվրամիությանը»,– ընդգծել է Եվրահանձնաժողովի ղեկավարը։
Ֆոն դեր Լյայենը նաև ԵՄ երկրների իշխանություններին կոչ է արել պատրաստ լինել արտասովոր որոշումներ կայացնել:
Այսպես է նա մեկնաբանել Ուկրաինայի նախագահ Վլադիմիր Զելենսկու հետ իր հանդիպումը և Եվրամիությանն անդամակցելու շուրջ բանակցություններ սկսելու համար հարցաթերթով ծրարը նրան փոխանցելը: Նրա խոսքով՝ հարցաթերթիկը հիմք կդառնա առաջիկա ամիսների քննարկումների համար:
Ուկրաինայի ԵՄ-ին անդամակցության հայտի քննարկումն առայժմ հետաձգել են մինչև ամառ, սակայն, Զելենսկու խոսքով, ԵՄ-ին Ուկրաինայի անդամակցության օգտին արդեն հանդես են գալիս Լիտվան, Լատվիան, Էստոնիան, Լեհաստանը: