Բուսաբուծական արտադրանքի առումով Հայաստանը մեծ կախվածություն չունի թուրքական շուկայից, ընդհակառակը՝ այդ կախվածությունը շատ փոքր է, բանջարեղենի և մրգերի մեծ պահանջարկ վայելող տեսականին արտադրվում է Հայաստանում։ Sputnik Արմենիայի եթերում, խոսելով թուրքական բանջարեղենի թանկացումների՝ հայկական շուկայի վրա ազդեցության մասին, ասաց ՀՀ գյուղատնտեսության նախկին փոխնախարար Գառնիկ Պետրոսյանը։
Ըստ Պետրոսյանի, խնդիրը կարող է լինել միայն ցիտրուսային մրգերի դեպքում, որոնք Հայաստանում չեն արտադրվում և Թուրքիայից են ներկրվում։ Եթե դրանց գները բարձրանան Թուրքիայում, բնականաբար, դա ուղղակիորեն իր ազդեցությունը կունենա մեր շուկայի վրա։ Չնայած Հայաստանը ցիտրուսային մրգեր ներկրում է ոչ միայն Թուրքիայից, այլև Իրանից, Վրաստանից և այլ տեղերից։
Անդրադառնալով այն տեսակետին, որ հայկական տեղական արտադրությունը շուկան կպահի, նույնիսկ եթե թուրքական ապրանքը թանկ է, Պետրոսյանը նշեց՝ մեր ջերմատնային տնտեսության համակարգը բավականին լավ զարգացման գործընթացում է։
«Առաջիկա ամիսներին՝ մինչ բաց դաշտում բերքահավաքը, լոլիկի ամբողջ պահանջարկը լի ու լի կբավարարի տեղական արտադրության հաշվին։ Նույնը վերաբերում է նաև վարունգին և բանջարեղենի մնացած տեսակներին։ Սկսվում է նաև վաղահաս կարտոֆիլի բերքահավաքը, թեպետ իհարկե շատ փոքր քանակությամբ ու շատ բարձր գնով դեռևս, ինչն այդպես էլ պետք է լիներ։ Ամսի վերջերին կամ մայիսի սկզբին շատ ավելի բարձր տեմպերով բերքահավաքը կկատարվի և, բնականաբար, նաև թարմ կարտոֆիլի գների որոշակի իջեցում կլինի»,- մանրամասնեց նախկին պաշտոնյան։
Ավելին՝ Պետրոսյանն ասում է, որ թուրքական ապրանքի թանկացումը նույնիսկ լավ կանդրադառնա հայկական արտադրողի վրա, որովհետև, օրինակ թուրքական լոլիկը, որը մուտք էր գործում հայկական շուկա, միանշանակ զիջում է մեր տեղականին, բայց ցածր գնի հաշվին գնվում էր ու հետ մղում տեղականին։
Գյուղմթերքում թանկացում լինելու է, բայց Պետրոսյանի կարծիքով, դա որևէ կապ չի ունենալու Թուրքիայի հետ։ Թանկացումը կապված կլինի այլ ոլորտների թանկացումների հետ, օրինակ՝ կտրուկ բարձրացել է պարարտանյութերի, թունաքիմիկատների, վառելանյութերի գինը, ու այս ամենն իր ազդեցությունը կունենա նաև գյուղատնտեսական մթերքների գների վրա։
Հիշեցնենք, որ Թուրքիայում վերջին շրջանում տարբեր ապրանքների կտրուկ թանկացումներ են նկատվում։ Նախ թանկացել էր բուսայուղը, այնուհետ շաքարը, իսկ վերջին մեկ շաբաթում տասնապատիկ թանկացել է բանջարեղենը: Այսպես, եթե 2021-ին 1 կգ պոմիդորն արժեր 1.5 թուրքական լիրա (50 դրամ), ապա այժմ այն դարձել է 14-25 լիրա (500-800 դրամ)։ Քաղաքացիները բողոքում են, որ ստիպված են բանջարեղենը կիլոգրամի փոխարեն հատով գնել:
Թանկացել են նաև գազը և էլեկտրաէներգիան: Պետական գազային Botaş ընկերությունն ի պատասխան քաղաքացիների բողոքների, հայտարարել էր, որ չթանկացնել չեն կարող:
Բացի այդ, թուրքական լիրան շարունակում է արժեզրկվել` ապրիլի 9-ի տվյալներով 1 դոլարի դիմաց կազմելով 14,70 լիրա: