ԵՐԵՎԱՆ, 9 ապրիլի – Sputnik. Թուրքիայի Անթալիա քաղաքում միայն Ռուսաստանից Թուրքիա զբոսաշրջիկներ տեղափոխելու համար հատուկ ավիաընկերություն է կառուցվելու, երկրի ենթակառուցվածքների և Ֆինանսների նախարարություններն արդեն սկսել են աշխատել այդ ուղղությամբ։ Այս մասին հայտնում է թուրքական Sabah թերթը՝ հղում անելով իր աղբյուրներին։
Թերթի տվյալներով՝ բացի առանձին ընկերությունը, Թուրքիայում նախատեսում են նաև վարկային օգնություն տալ այն ավիաընկերություններին, որոնք ռուս զբոսաշրջիկներին կտեղափոխեն Թուրքիա։ Օրինակ, Ռուսաստանում գործող թուրքական ավիաօպերատորները (Anex, Pegas և Coral ընկերությունների գլխավորությամբ), որոնք ապահովում են ռուս զբոսաշրջիկների փոխադրումը Թուրքիա, 300 մլն դոլարի վարկ կստանան որպես օգնություն։
Նախատեսվող երրորդ փուլն էլ այս նույն ընկերությունների համագործակցությունն է «Թուրքական ավիաուղիներ» պետական ավիափոխադրող ընկերության հետ, քանի որ արևմտյան պատժամիջոցների պատճառով այս ընկերությունները չեն կարող թռիչքներ կազմակերպել Ռուսաստանից Թուրքիա՝ ապահովագրություն չունեն։
Համագործակցության արդյունքում «Թուրքական ավիաուղիները» նույն Anex, Pegas և Coral ընկերությունների համար առանձնացրել է մոտ 1,5 մլն ուղևորաթոռ։ Սպասվում է նաև, որ թուրքական «Pegasus» ավիաուղիներով ռուսական արտադրության ինքնաթիռներով ու ռուսական մասնավոր ընկերությունների միջոցով Թուրքիա կուղևորվի 500 հազար զբոսաշրջիկ։ Այսպիսով, այս տարվա համար Թուրքիայում կապահովեն 2 մլն ռուս զբոսաշրջիկի մեկնումը Թուրքիա։
Հիշեցնենք, որ Թուրքիայի զբոսաշրջության ոլորտում խնդիրները ծագել են Ուկրաինայի իրադարձությունների և ՌԴ–ի դեմ արևմտյան պատժամիջոցների հետևանքով։ Թուրքիայի Արտաքին տնտեսական հարաբերությունների խորհրդի Թուրքիա-Ռուսաստան աշխատանքային խորհրդի նախագահ Իզեթ Էքմեքչիբաշըն հայտնել էր, որ անցած տարի 4,5 մլն ռուս զբոսաշրջիկ է մեկնել Թուրքիա, ու այդ կապակցությամբ այս տարի սպասվում էր, որ այդ թիվը կլինի 6-6,5 մլն, սակայն ստեղծված ճգնաժամային իրավիճակի պատճառով այս տարի Թուրքիայում ընդամենը 3-3,5 մլն ռուս զբոսաշրջիկի են սպասում։