ԵՐԵՎԱՆ, 9 ապրիլի – Sputnik. 2022 թվականի առաջին եռամսյակում Հայաստան է այցելել 250 798 զբոսաշրջիկ։ Իր ֆեյսբուքյան էջում տվյալները հայտնել է ՀՀ էկոնոմիկայի նախարար Վահան Քերոբյանը` ներկայացնելով նաև համեմատական տվյալներ այլ տարիների հետ։
Մասնավորապես, Քերոբյանը տեղեկացնում է, որ 2021-ի առաջին եռամսյակում ՀՀ է եկել 87 131 զբոսաշրջիկ, այսինքն` 163 667 զբոսաշրջիկով ավել մարդ է եկել այս տարի ՀՀ։ Սակայն այս տարվա ցուցանիշը զիջում է նախաքովիդյան` 2019-ի առաջին եռամսյակում ՀՀ եկած զբոսաշրջիկներ թվին։ Այս տարի, ի տարբերություն 2019-ի, 82 352-ով քիչ է ՀՀ այցելած զբոսաշրջիկների թիվը։
Միաժամանակ, ընթացիկ տարվա առաջին եռամսյակում ամենաշատը հունվար ամսին են զբոսաշրջիկներ եկել ՀՀ (94 339 անձ), իսկ փետրվար և մարտ ամիսների ՀՀ եկածների թիվը հետևյալ պատկերն ունի` 72 262 և 84 197։
Հիշեցնենք, որ Ուկրաինայի իրադարձությունների ֆոնին Հայաստանը դարձել է Ռուսաստանի, Ուկրաինայի և Բելառուսի քաղաքացիների համար պահանջված ուղղություններից մեկը։
Ռուսաստանի շուրջ 4.5 հազար քաղաքացիներ հայաստանյան բանկերում հաշիվներ են գրանցել։ ՌԴ 938 քաղաքացիներ ՀՀ–ում գրանցվել են որպես անհատ ձեռնարկատեր, իսկ 268-ը սահմանափակ պատասխանատվությամբ ընկերություն է ձևակերպել։
OneTwoTrip–ն օրերս գրել էր, որ Հայաստանը ռուսաստանցի զբոսաշրջիկների նախընտրած հնգյակում է մայիսյան տոներին։