ԵՐԵՎԱՆ, 8 ապրիլի – Sputnik. Ուկրաինական զորքերը հրթիռակոծել են ԴԺՀ-ի Յասինովատայա բնակավայրը՝ ութ հրթիռ արձակելով «Գրադ» համազարկային կրակի ռեակտիվ համակարգից։ Տեղեկությունը հայտնում է հրադադարի ռեժիմի վերահսկման և համակարգման համատեղ կենտրոնում ԴԺՀ ներկայացուցչությունը։
Նշվում է, որ ապրիլի 8-ի առավոտյան ուկրաինական զորքերը տասը րոպեում չորս գնդակոծություն են իրականացրել ԴԺՀ-ի Յասինովիտայա, Դոնեցկ և Պանտելեյմոնովկա բնակավայրերի ուղղությամբ։ Ընդհանուր առմամբ արձակվել է 122 մմ տրամաչափի 22 արկ և 120 մմ տրամաչափի 6 արկ։
Բացի այդ, ուկրաինական զորքերը կրակոցներ են արձակել ԼԺՀ Կալինովո և Դոնեցկի բնակավայրերի ուղղությամբ:
«Ուկրաինայի զինված խմբավորումների կողմից 4 գնդակոծություն է արձանագրվել Դոնեցկի բնակավայրի ուղղությամբ, Կալինովո բնակավայրի ուղղությամբ՝ 152 միլիմետրանոց հրանոթային զենքի կիրառմամբ (27 արկ) և 120 միլիմետրանոց ականանետի կիրառմամբ (10 ական)»,-նշվում է հաղորդագրության մեջ։
Գնդակոծությունների հետևանքով վեց տուն է վնասվել։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21-ից ի վեր, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ-ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։ Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 44–րդ օրը։