ԵՐԵՎԱՆ, 8 ապրիլի – Sputnik. Ռուսաստանցի հայտնի երգչուհի Օլգա Բուզովան իր տելեգրամյան ալիքի նոր հրապարակման մեջ դիմել է ֆրանսիական Chanel ընկերությանը՝ պահանջելով իրեն վերադարձնել լյուքս դասի ապրանքանիշների գնման համար ծախսված գումարը։
«Ես հիմա Chanel կրելու ոչ մի ցանկություն չունեմ, ես չեմ ցանկանում այլևս առնչություն ունենալ ձեր նացիստական ապրանքանիշի հետ»,- իր բլոգում հայտարարել է երգչուհին։
Նա իր հետևորդներին առաջարկել է աջակցել իրեն ու Chanel-ին բազմաթիվ բողոքներ ուղղել։ Բուզովան խոստացել է կրկնապատկել գումարը, որն ապրանքանիշը կվերադարձնի իրեն և այն բարեգործությանն ուղղել։
Նշենք, որ ավելի վաղ Դուբայում գտնվող մի ռուսաստանցի նշել էր, որ իրեն մերժել են Chanel-ի պայուսակ վաճառել, քանի դեռ նա պարտավորագիր չի ստորագրի, որ գնված ապրանքը չի տանի Ռուսաստան և չի կրի այնտեղ։ Սակայն Chanel ընկերությունը հերքել էր այդ տեղեկությունը՝ ասելով, որ ազգությամբ պայմանավորված վաճառքի սահմանափակումը ընկերության քաղաքականությունը չէ։